ආපදා සහන සේවා සඳහා නාවික හමුදා මෙහෙයුම් අඛණ්ඩව
Saturday, 25 January 2025 - 10:36 am
අයහපත් කාලගුණික තත්ත්වයෙන් පීඩාවට පත් ජනතාවට සහන සැලසීම සඳහා නාවික හමුදා මෙහෙයුම් අඛණ්ඩව සිදුකරමින් පවතින බව නාවික හමුදාව පවසනවා.
ඒ අනුව ඊයේ (24) දිනයේදී නාවික හමුදාව විසින් අනුරාධපුර දිස්ත්‍රික්කයේ පදවිය බුද්ධංගල, මහකනදරාව අලුත්පාරගම ප්‍රදේශ වෙතත්, අම්පාර දිස්ත්‍රික්කයේ ලාහුගල ප්‍රදේශය වෙතත් නාවික හමුදා ආපදා සහන කණ්ඩායම් 04ක් අනුයුක්ත කිරීමට පියවර ගෙන තිබුණා.
එම සහන කණ්ඩායම් විසින් බුද්ධංගල සහ මහකනදරාව අලුත්පාරගම ප්‍රදේශයේ අධික වර්ෂාපතනය හේතුවෙන් ආපදාවට පත් මහජනතාවට අවශ්‍ය සහන සැලසීමේ මෙහෙයුම් සහ අධික වර්ෂාව නිසා ආපදාවට පත්ව ඇති ලාහුගල මහ වැවේ වැලි කොට්ට යොදා තාවකාලික ආධාරක ඉදි කිරීමේ කටයුතු සිදු කරමින් සිටින අතර මේ වන විට පාසල් ළමුන් ඇතුළු පුද්ගලයින් 3009 දෙනෙකු වෙත නාවික හමුදා යාත්‍රා මඟින් ආරක්ෂිතව ප්‍රවාහන පහසුකම් සලසා දී තිබෙන බවයි සඳහන් වන්නේ.
තවද, ගංවතුර අවධානම හමුවේ පීඩාවට පත්වන ජනතාවට අවශ්‍ය සහන කඩිනමින් සැලසීම සඳහා අවශ්‍යතාවය මත ස්ථානගත කිරීමට නාවික හමුදා අමතර සහන කණ්ඩායම් හතලිස් අටක් මේ වන විටත් සූදානමින් තබා ඇති බවද නාවික හමුදාව නිකුත් කළ නිවේදනයේ වැඩිදුරටත් සඳහන්.
