ඡන්ද පෙට්ටි පස්සෙන් යන්න අවස්ථාව..
Sunday, 15 September 2024 - 9:27 am
මැතිවරණයක දී සිදු විය හැකි යැයි පැවසෙන ඡන්ද පෙට්ටි මාරු කිරීම් කිසිදු අයුරකින් සිදු නොවන බව මැතිවරණ කොමිෂන් සභාවේ සභාපති ආර්.එම්.ඒ.එල්.රත්නායක මහතා පැවසීය.
ඡන්ද පෙට්ටි මාරු කරනවා යනු හුදු යල් පැන ගිය අතීත මතයක් මිසෙක වර්තමානයේ දී සිදු නොවන ක්‍රියාවකි.
ඡන්ද පෙට්ටි ගණනය කරන ඡන්ද ගණන් කිරීමේ මධ්‍යස්ථානය දක්වා රැගෙන යාමේ දී එම සෑම පෙට්ටියකට ම අනන්‍ය වූ රහස්‍ය අංකයක් ඇති බව සභාපතිවරයා පැවසීය.
එම ඡන්ද පෙට්ටි භාරදීමේ දී ද ජේෂ්ඨ ඡන්ද ස්ථානාධිපතිවරයෙකුගේ පුළුල් අධීක්ෂණය සහ නිරීක්ෂණයන් මත එම කටයුතු සිදු වෙයි.
නැවතත් එම ඡන්ද පෙට්ටි භාර ගැනීමේ දී ද මධ්‍යස්ථාන නිරීක්ෂකවරුන්ගේ අධීක්ෂණය යටතේ සිදු කෙරේ.
එබැවින් මහජනතාව හෝ දේශපාලන පක්ෂ හෝ අපේක්ෂකයින් ඒ සම්බන්ධයෙන් අනියත බියක් හෝ අවිශ්වාසයක් ඇති නොකරගත යුතුය.
මේ අතර ඡන්ද පෙට්ටි ගණනය කිරීමේ මධ්‍යස්ථාන වෙත රැගෙන යාමේ දී දේශපාලන පක්ෂ නියෝජිතයින්ට කණ්ඩායමක් වශයෙන් සිය වාහන මගින් විශේෂ අවසරයක් මැතිවරණ කොමිෂන් සභාවෙන් ගෙන ඡන්ද පෙට්ටි පසුපසින් ගමන් කිරීමට හැකි බව වැඩිදුරටත් පැවසීය.
