කොළොන්නාව, මීතොටමුල්ලේ රිච් ෆුඩ් නිෂ්පාදන (Rich Food Product) සැකසුම් කර්මාන්ත ශාලාව දැකබලා ගැනීම සඳහා ජනමාධ්‍ය, ප්‍රවාහන හා මහාමාර්ග අමාත්‍ය ආචාර්ය බන්දුල ගුණවර්ධන මහතා පසුගියදා ගියේය.

කර්මාන්ත ශාලාව තුළ සිදු කෙරෙන කාර්යයන් දැක බලා ගැනීම මෙන්ම දේශීය ව්‍යවසායකයින් දිරිගැන්වීම අමාත්‍යවරයාගේ මෙම ගමනේ අරමුණ විය.

දේශීය පලතුරු වර්ග උපයෝගි කර ගෙන කේක් හා අයිස්ක්‍රීම් නිෂ්පාදනය සඳහා මෙන්ම ඒවා රසගැන්වීම, අලංකරණය කිරීම සඳහා ගන්නා අමුද්‍රව්‍ය නිපදවීම මෙම කර්මාන්ත ශාලාව තුළදී සිදු කරයි. දේශීය ව්‍යවසායකයෙකු ලෙස පවුලේ අය සමඟ එක්ව සුළු පරිමාණයෙන් 1994 වර්ෂයේ ආරම්භ කළ මෙම ව්‍යාපාරය තුළින් මේ වන විට 40කට වැඩි පිරිසකට රැකියා අවස්ථා ලබාදීමට රිච් ෆුඩ් අධිපති එස්. සරත්චන්ද්‍ර මහතාට හැකි වී ඇත.

පසුගිය කාලයේ ඇතිවූ කොවිඩ් වසංගතය නිසා බරපතළ අර්බුදයට ලක්ව තිබූ තම ව්‍යාපාර කටයුතු මේවන විට නැවතත් යථා තත්ත්වයට පත්වෙමින් ඇති බව එස්. සරච්චන්ද්‍ර මහතා මෙහිදී අමාත්‍ය ආචාර්ය බන්දුල ගුණවර්ධන මහතාට පැවසීය.

මුළු ලංකාවේම අපතේ යන කෘෂිකාර්මික නිෂ්පාදන ගොවීන්ගෙන් මිලදී ගෙන ඒවාට අගයක් එකතු කරල ඒ අගය ලංකාව තුළ මහා පරිමාණයේ කර්මාන්තශාලාවලට යෙදවුමක් ලෙස සපයලා අපේ රටට පිටරටින් ආපු භාණ්ඩ විශාල ප්‍රමාණයක් මෙම කර්මාන්ත ශාලාව තුළ නිපදවා විශාල විදේශ විනිමය ප්‍රමාණයක් ඉතිරි කර සුළු හා මධ්‍ය පරිමාණයේ ව්‍යාපාරකයින්ට මහත් ආදර්ශයක් සරත්චන්ද්‍ර මහතා ලබාදෙන බව අමාත්‍ය ආචාර්ය ඛන්දුල ගුණවර්ධන මහතා මෙහිදී පැවසීය.

අමාත්‍යවරයා සමග මෙම අවස්ථාවට ප්‍රාදේශීය දේශපාලඥයන් කීපදෙනෙකු එක් වූහ.