නව දේශපාලන සංස්කෘතියක් රටට හඳුන්වා දෙන බව ජනපති කියයි
Tuesday, 05 November 2024 - 11:27 am
රට තුළ පවතින දේශපාලන සංස්කෘතිය වෙනස් කිරීම ජාතික ජන බලවේගයේ අපේක්ෂාව බව ජනාධිපති අනුර කුමාර දිසානායක මහතා පවසයි.
ජනාධිපතිවරයා පෙන්වා දෙන්නේ, දේශපාලනය සඳහා යම් ප්‍රමිතියක් ක්‍රියාත්මක විය යුතු බවය.
මොනරාගල ප්‍රදේශයේ පැවති ජන රැලියකට එක්වෙමින් ජනාධිපති අනුර කුමාර දිසානායක මහතා මෙම අදහස් පළ කළේය.
'අපේ රටට දේශපාලනයේ ප්‍රමිතියක් අවශ්‍යයි. දේශපාලඥයාට හිතූ හිතූ දේ කරන්න පුළුවන් ද ? එහෙම බෑ. යම් නිර්ණායක පද්ධතියක්. යම් රාමුවක දේශපාලඥයා වැඩ කරන්න ඕනේ. දේශපාලකයා නීතියට යටත් වෙන්න ඕනේ. ශිෂ්ට සම්පන්න රාමුවක, ශිෂ්ට සම්පන්න කොටුවක් ඇතුළේ, තමා දේශපාලකයා ඉන්න ඕනේ. හැබැයි එහෙම නෑනේ අපේ රටේ. දැන් බලන්න වාහන හම්බවෙනවා. ලියාපදිංචි කරලා නැති වාහන, රේගුවෙන් නිසි පරිදි රේගු බදු ගෙවන්නේ නැතුව පන්නපු වාහන. සමහර වාහන බලනකොට එංගලන්තයෙන් උස්සපු ඒවා. ලේසි කට්ටිය නෙමෙයි. ඒ අයට එහෙම නීති අදාළ නෑ. අන්න අපේ රටේ දේශපාලන සංස්කෘතිය. ඒ නිසා අපි නීතිය ඉදිරියේ හැමකෙනාම සමානයි කියන සංකල්පයට පණ පොවනවා. ඒක අපි කරනවා. අපේ රටේ ජනාධිපතිවරයා වුණාට, අමාත්‍යවරයා වුණාට රිසි රිසි පරිදි තමන්ගේ මහජන දේපොළ උපයෝගී කරගන්න බෑ. එයාලා හිතනවා එහෙම. එහෙම දේශපාලනයක් ඕන නෑ. ඒ නිසා මේ දේශපාලනය ප්‍රමිතිගත කරනවා.'
