Local

රවී කරුණානායකගේ පෙත්සම ශ්‍රේෂ්ඨාධිකරණය විසින් ප්‍රතික්ෂේප කරයි

Tuesday, 03 June 2025 - 9:18 pm

අල්ලස් කොමිසම විසින් කොළඹ මහාධිකරණය හමුවේ තමන්ට එරෙහිව ගොනු කර ඇති නඩුවට එරෙහිව පාර්ලිමේන්තු මන්ත්‍රී රවී කරුණානායක ගොනුකළ පෙත්සමක් ශ්‍රේෂ්ඨාධිකරණය විසින් ප්‍රතික්ෂේප කර තිබෙනවා.

ඒ අනුව මුදල් අමාත්‍යවරයා ලෙස සිටියදී පාර්ලිමේන්තු මන්ත්‍රී රවී කරුණානායක වාසය කළ සුඛෝපබෝගී නිවසේ කුලිය ගෙවීම පර්පචුවල් ට්‍රෙෂරිස් සමාගමේ ප්‍රධානියා වූ අර්ජුන ඇලෝසියස්ට පැවරීම සම්බන්ධයෙන් අල්ලස් කොමිසම මහාධිකරණය හමුවේ නඩු පවරා තිබුණා.

මාසික කුළිය ලෙස රුපියල් 1,450,000 ගෙවා තිබූ අතර, රවී කරුණානායක වෙනුවෙන් මාස 08ක කාලයක් අර්ජුන ඇලෝසියස් විසින් මෙලෙස කුලිය ගෙවා ඇති බවයි අල්ලස් කොමිසම මහාධිකරණය වෙත දැනුම් දී ඇත්තේ.

අල්ලස් පනත යටතේ අමාත්‍යවරයෙකුට එරෙහිව නඩු පැවරිය නොහැකි බව රවී කරුණානායකගේ නිතීඥයින් තර්කයක් මතුකර තිබුණු අතර, එය මහාධිකරණය විසින් ප්‍රතික්ෂේප කර ඇති බවයි සඳහන් වෙන්නේ.