මහාචාර්ය අර්ජුන තනතුරු අත්හරියි
Friday, 20 September 2024 - 9:56 am
ශ්‍රී ලංකා උත්තේජක මර්දන නියෝජ්‍යායතනයේ (SLADA) සභාපති ලෙස වසර 13ක් සේවය කළ මහාචාර්ය අර්ජුන ද සිල්වා මහතා එම තනතුරෙන් ඉල්ලා අස්වෙයි. මෙයට සති ගණනාවකට පෙර ගත් එම තීරණය ඊයේ පැවති මාධ්‍ය හමුවකදී නිල වශයෙන් ඒ මහතා ප්‍රකාශ කළේය.
විනයවත් පිරිසිදු ක්‍රීඩාවක් පවත්වා ගැනීම උදෙසා වසර 2011 සිට ශ්‍රී ලංකා උත්තේජක මර්දන නියෝජ්‍යායතනයේ ප්‍රධානියා ලෙස කටයුතු කළ ඒ මහතාගේ නායකත්වයෙන් තහනම් උත්තේජක පරිපාලන කටයුතු වෙනුවෙන් නව නිවහනක් ඉදිකළ අතර, ශ්‍රී ලංකාව ආසියානු කලාපයේ 6 වැනි ස්ථානය දක්වා ඉදිරියට ගෙන ආවේය.
උත්තේජක මර්දන නියෝජ්‍යායතනය ලෙස ශ්‍රී ලංකාව ලබා ඇති ප්‍රගතිය හේතුවෙන් ජාත්‍යන්තර ක්‍රිකට් කවුන්සිලය (අයිසීසී) යටතේ පවතින තරගාවලිවල තහනම් උත්තේජන පරීක්ෂා ලබාදීමට එකඟවී ඇතැයි ද ඒ මහතා පැවසීය. එයින් ඉදිරියේදී ශ්‍රී ලංකාවට විශාල ඩොලර් ආදායමක් ලබාගත හැකි බව මහාචාර්යවරයා පෙන්වා දුන්නේය.
“ගෙවී ගිය කාලය තුළ අප ලැබූ ප්‍රගතිය විශාලයි. ඒ නිසාම කිසිදු ජාත්‍යන්තර තරගයකදී අපේ ක්‍රීඩකයකුට තහනම් උත්තේජක චෝදනා එල්ල වෙලා නෑ. දෙක තුනක් ශ්‍රී ලංකාවේ පැවති තරගවලදී වාර්තා වුණා. අපි කඩා පැනලා පරීක්ෂණ කරනවාට වඩා තහනම් උත්තේජක භාවිතයෙන් සිදු වන විපාක සම්බන්ධයෙන් අධ්‍යාපන වැඩසටහන් කරනවා. හරි වේලාවට තනතුරු අත්හල යුතුයි. තවත් කෙනෙකුට අවස්ථාව දීලා තනතුරෙන් ඉවත්වීමට තීරණය කළා” මහාචාර්ය අර්ජුන ද සිල්වා මහතා පැවසීය.
වසර 2013දී තහනම් උත්තේජක මර්දන පනත පාර්ලිමේන්තුවේ සම්මත වූ අතර, එය ජාත්‍යන්තර ප්‍රජාවගේ පැසසුමට ලක්විය. 2016 සිට 2019 දක්වා අර්ජුන ද සිල්වා මහතා දකුණු ආසියා තහනම් උත්තේජක මර්දන සභාපතිවරයා ලෙස ද කටයුතු කළේය. මේ මාධ්‍ය හමුවට ශ්‍රී ලංකා උත්තේජක මර්දන නියෝජ්‍යායතනයේ අධ්‍යක්ෂ ජනරාල් වෛද්‍ය ශිරෝමි පිලපිටිය හා වෛද්‍ය ධම්මික සේනානායක මහතා ඇතුළු විශාල පිරිසක් එක්ව සිටියහ.
.webp)
