අමෙරිකානු නව බදු ප්‍රතිපත්තිය පිළිබඳව රජය ගන්නා ක්‍රියාමාර්ග ගැන රට දැනුවත් කළ යුතුයි - රනිල්
Wednesday, 16 April 2025 - 8:34 pm
අමෙරිකානු නව බදු ප්‍රතිපත්තිය තුළින් මෙරට ලක්ෂයකට අධික පිරිසකගේ රැකියා අහිමිවීමේ අවදානමක් පවතින බව හිටපු ජනාධිපති රනිල් වික්‍රමසිංහ පවසනවා.
මෙය හදිසි අවස්ථාවක් ලෙස සලකා අමෙරිකානු නව බදු ප්‍රතිපත්තිය පිළිබඳව රජය ගන්නා ක්‍රියාමාර්ග ගැන රට දැනුවත් කළ යුතු බවයි අද (16) විශේෂ ප්‍රකාශයක් සිදු කරමින් හිටපු ජනාධිපතිවරයා සඳහන් කළේ.
මෙම තීරු බද්දේ එක බලපෑමක් වන්නේ රැකියා අහිමිවීම බව ද, එයට සම්බන්ධ පිරිස් ද මේ හරහා බලපෑමට ලක්වන අතර, බෝඩින් කාමර ලබාදෙන පිරිස්, කඩ සාප්පු පවත්වා ගෙන යන පිරිස් වෙත ද අවධානමක් ඇති බව ද, සෑම කෙනෙකුගේම ආදායමට මෙයින් පහර වැදෙන බව ද හිටපු ජනාධිපතිවරයා ප්‍රකාශ කළා.
මෙරට ආර්ථිකයට ද පහරක් මේ තුළින් වැදෙන බවත්, අපට ලැබෙන මුදල් ප්‍රමාණය අඩුවීම හේතුවෙන්, ණය ගන්නා ප්‍රමාණය වැඩිවන අතර, මේ අර්බුදය නිසා රුපියලේ අගය තවත් අඩුවනු ඇති බවත්, ආර්ථිකයේ වර්ධන වේගය අඩුවිය හැකි බවයි ඔහු වැඩිදුරටත් ප්‍රකාශ කර සිටියේ.
