‘විශ්ව බුද්ධි’ 26 තෙක් රිමාන්ඩ්
Monday, 22 January 2024 - 10:06 pm
බුදු දහමට අපහාස වන අයුරින් ප්‍රකාශ නිකුත් කර ජනතාවගේ ආගමික සංහිඳියාවට බාධා වන අයුරින් කටයුතු කළැයි අපරාධ පරීක්ෂණ දෙපාර්තමේන්තුව අත්අඩංගුවට ගත් රත්නපුරේ විමල බුද්ධි නොහොත් “විශ්ව බුද්ධ” නමැති චීවරධාරියා ලබන 26 වැනිදා තෙක් රක්ෂිත බන්ධනාගාර ගත කරන ලෙස ගංගොඩවිල වැඩබලන මහේස්ත්‍රාත් සුනිල් හෙට්ටිආරච්චි මහතා ඊයේ (21) නියෝග කළේය.
සිවිල් හා දේශපාලන සම්මුති පනත, පරිගණක අපරාධ පණතේ 06 වැනි වගන්තිය සහ සහ ලංකා දන්ඩ නීති සංග්‍රහයේ 290 වගන්තිය යටතේ වරදක් සිදුකර ඇතැයි සඳහන් කරමින් අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශය මෙම සැකකරු අධිකරණයට ඉදිරිපත් කළ අවස්ථාවේ දී මෙම කරුණු ඉදිරිපත් විය. කොළඹ ප්‍රධාන මහේස්ත්‍රාත් අධිකරණයේ මෙම සැකකාර චීවරධාරියා සම්බන්ධයෙන් මෙවැනිම ආකාරයේ නඩුවක් විභාග වෙමින් පවතින අවස්ථාවක මොහු ඇප මත සිටිමින් එවැනිම වැරදි දිගින් දිගටම සිදුකරමින් සිටින බව අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.
මෙම සැකකරු සිදුකර ඇති වැරැද්ද සම්බන්ධයෙන් කරුණු පහදා දී ඔහුගේ නිවසේ දී එනම් කලහෙඩිහේන ප්‍රදේශයේ දී ඊයේ (21) පෙරවරුවේ අත්අඩංගුවට ගත් බව අපරාධ පරීක්ෂණ දෙපාර්තමේන්තුව සැකකාර චීවරධාරියා අධිකරණයට ඉදිරිපත් කරමින් පැවැසීය. මෙම සැකකරු ඇප මත සිටිමින් නැවතත් නුගේගොඩ ප්‍රදේශයේ සිට යූ ටියුබ් නාලිකාවක් ඔස්සේ බුදු දහමට මෙන්ම භික්ෂූන් වහන්සේලාට අපහාස වන අයුරින් මාධ්‍ය සාකච්ඡාවක් පවත්වා ඇති බවත්, ඒ සම්බන්ධයෙන් භික්ෂූන් වහන්සේලාගෙන් මෙන්ම ගිහි ජනතාවගෙන්ද විශාල පැමිණිලි ප්‍රමාණයක් ලැබීම හේතුවෙන් මෙම විමර්ශනය ආරම්භ කළ බවත් අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කළේය. බෞද්ධ භික්ෂුවක් වශයෙන් නිර්වාණය සාක්ෂාත් කර ගැනීමට නම් කැප අකැප සියලු දේ අත්හදා බැලිය යුතු බවත් නොඑසේ නම් නිර්වාණය අවබෝධ කරගත නොහැකි බවත් යනුවෙන් සඳහන් කරමින් මෙම සැකකාර චීවරධාරියා බෞද්ධ ආගම හා දර්ශනය විකෘති වන ආකාරයේ ප්‍රකාශ මෙම මාධ්‍ය සාකච්ඡාවේ දී ප්‍රකාශ කර ඇතැයිද අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කළේය. සැකකරු වෙනුවෙන් අධිකරණයේ පෙනී සිටි නීතිඥ නුවන් බෝපගේ මහතා සඳහන් කර සිටියේ මෙම සැකකරු සම්බන්ධයෙන් කොළඹ ප්‍රධාන මහේස්ත්‍රාත් අධිකරණයේ පවතින නඩුවේ දී ප්‍රධාන මහේස්ත්‍රාත්වරයා නියෝගයක් නිකුත් කරමින් සඳහන් කර සිටියේ මෙම වරද සිවිල් හා දේශපාලන පනතට නො වැටෙන බවත්, ඒ හෙයින් මෙම නඩුවට ද අපරාධ පරීක්ෂණ දෙපාර්තමේන්තුව එම පනත අදාළ කරගෙන ඇති බවත්ය. එම සිද්ධියට අදාළව ලබන 24 වැනිදා කොළඹ ප්‍රධාන මහේස්ත්‍රාත් අධිකරණයට ඉදිරිපත් වන ලෙසට තම සේවා දායකයාට නොතීසි නිකුත් ව ඇති බව ද නීතිඥවරයා අධිකරණයට දැනුම් දුන්නේය. එම නඩුවට අදාළව තම සේවා දායකයා ඇප මත සිටින බැවින් මෙම නඩුවටද ඇප ලබාදෙන ලෙසට නීතිඥවරයා අධිකරණයෙන් ඉල්ලීය. ඉදිරිපත් වූ කරුණු සැලකිල්ලට ගත් වැඩ බලන මහේස්ත්‍රාත්වරයා වැඩිදුර විමර්ශන පවත්වා අධිකරණයට කරුණු වාර්තා කරන ලෙසට අපරාධ පරීක්ෂණයට දෙපාර්තමේන්තුවට නියෝග කරමින් ලබන 26 වැනිදා තෙක් සැකකරු රක්ෂිත බන්ධනාගාරගත කළේය.
එම සිදුවීමත් සමඟ රත්නපුර විමල බුද්ධි හිමි හෙවත් සැකකරු ශිෂ්‍යභාවයෙන් හා නිකායෙන් නෙරපීමට රාමාඤ්ඤ මහා නිකායේ කාරක සංඝ සභාව ඉකුත් වසරේ දෙසැම්බර් මස 15 වැනිදා ඒකමතිකව තීරණය කර තිබුණි. ඒ ඔහු පැවිදි කරවූ උරුවල විනීත හිමියන් සිදුකළ ඉල්ලීමක්ද සැලකිල්ලට ගනිමිනි. ඒ අනුව, අග්ගමහා පණ්ඩිතය මකුලෑවේ විමල රාමාඤ්ඤ මහා නිකායේ මහනායක මහනාහිමියන් ඒ බව බෞද්ධ කටයුතු පිළිබඳ කොමසාරිස් ජනරාල්වරයාට ලිඛිතව දැනුම් දී තිබේ.
