රවී කරුණානායක සැකකරුවෙක් කිරීමට එරෙහිව අභියාචනාධිකරණය ලබාදුන් නියෝගයක් ශ්‍රේෂ්ඨාධිකරණය විසින් ඉවත දමයි
Thursday, 05 June 2025 - 12:16 pm
2016 වසරේ ශ්‍රී ලංකා මහ බැංකුව විසින් සිදුකළ බැඳුම්කර වෙන්දේසියකදී රුපියල් බිලියන 36.98ක මුහුණත වටිනාකමකින් යුත් බැඳුම්කර සම්බන්ධයෙන් වංක ලෙස ව්‍යාපාරණය කිරීමට හෝ ඊට එකඟවීම ඇතුළුව, පොදු දේපළ පනත යටතේ කොළඹ ත්‍රිපුද්ගල මහාධිකරණ විනිසුරු මඩුල්ලක් හමුවේ ගොනුකර තිබූ නඩුවක විත්තිකරුවකු ලෙස හිටපු මුදල් අමාත්‍ය රවී කරුණානායක නම් කිරීමට නීතිපතිවරයා ගනු ලැබූ තීරණය බලරහිත කරමින් අභියාචනාධිකරණය විසින් දී තිබූ තීන්දුවක් ශ්‍රේෂ්ඨාධිකරණය විසින් ඉවත දමා තිබෙනවා.
ඒ අනුව නීතිපතිවරයා විසින් ඉදිරිපත් කර තිබූ විශේෂ අභියාචනා පෙත්සමක තීන්දුව දෙමින් එස්. තුරෙයි රාජා, ජනක් ද සිල්වා යන විනිසුරුවරුන්ගේ එකඟත්වය සහිතව ශ්‍රේෂ්ඨාධිකරණ විනිසුරු මහින්ද සමයවර්ධන විසින් එම තීන්දුව ප්‍රකාශයට පත්කර තිබෙනවා.
රවී කරුණානායක අදාළ නඩුවල විත්තිකරු වශයෙන් නම් කිරීමට නීතිපතිවරයා ගනු ලැබු තීරණය බලරහිත කරමින් අභියාචනාධිකරණය විසින් නිකුත් කළ තීන්දුව ඉවත දමන බවත්, එම තීන්දුවට අදාළව රවී කරුණානායක විසින් අභියාචනාධිකරණයට ඉදිරිපත් කළ රිට් පෙත්සම නිශ්ප්‍රභ කරන බවත් ත්‍රිපුද්ගල විනිසුරු මඩුල්ල සිය තීන්දුව මඟින් ප්‍රකාශයට පත්කර තිබෙනවා.
2015 ජනවාරි 01 සහ 2016 මාර්තු 31 අතර කාලසීමාව තුළ ශ්‍රී ලංකා මහා බැංකුව විසින් සිදුකළ බැඳුම්කර නිකුතුවලදී අවිධිමත් ක්‍රියා සහ අක්‍රමිකතා සිදුවූ බවට පැමිණිලි ඉදිරිපත් වූ බවත්, මේ හේතුවෙන් රටේ ආර්ථිකයට බිලියන ගණනාවක පාඩුවක් සිදු වූ බවට ප්‍රකාශ වී තිබෙන බවත්, මෙම ක්‍රියාව තුළින් ජාතික ආර්ථිකය මෙන්ම මහජන විශ්වාසය ද බිඳ වැටීමට හේතු වූ බවයි තීන්දුව ප්‍රකාශයට පත් කරමින් විනිසුරු මහින්ද සමයවර්ධන වැඩිදුරටත් සඳහන් කර තිබෙන්නේ.
.webp)
