Local

දක්ෂිණ අධිවේගයේ පරණ බිලකින් කෝටි 750ක් වංචා කරන්න හදනවා... වසන්ත සමරසිංහ

Monday, 02 September 2024 - 9:09 am

එක්තරා අපේක්ෂකයකුගේ මැතිවරණ ව්‍යාපාරයට වියදම් කිරීමට මුදල් සෙවීමට වර්ෂ 2011 වර්ෂයේදී දක්ෂිණ අධිවේගී මාර්ගය ඉදිකිරීමේදී මාර්ග සංවර්ධන අධිකාරිය මගින් අනුමත නොකළ පැරණි බිලක් සොයාගෙන, එයට අමාත්‍ය මණ්ඩලයේ සහ නීතිපතිවරයාගේ අනුමැතිය ලබාගෙන රුපියල් කෝටි හත්සිය පනහක මුදලක් චයිනා හාබර් සමාගම වෙත ගෙවීමට ආණ්ඩුව කටයුතු කරගෙන යන බව ජාතික ජන බලවේගයේ විධායක සභික වසන්ත සමරසිංහ මහතා පැවසීය.

ඒ පිළිබඳව තොරතුරු තමන් මාර්ග සංවර්ධන අධිකාරිය හරහා ලබාගත් බවත්, නීතිඥවරුන් සමග සාකච්ඡා කොට අදාළ නීතිවිරෝධී ගෙවීම අධිකරණ ක්‍රියාමාර්ගයක් මගින් මේ සතිය තුළ නතර කිරීමට පියවර ගන්නා බවත් ඒ මහතා සඳහන් කළේය.

අනුරාධපුර නගරයේ පැවැති ජනහමුවකින් පසු මාධ්‍යවේදීන් අමතා හෙතෙම මේ බව පැවසීය.