Local

සේරුගොල්ල අමුණේ දිය නෑමට ගිය සිසුවා මරුට

Saturday, 27 January 2024 - 9:21 am

මාතලේ රත්තොට බණ්ඩරපොළ සේරුගොල්ල අමුණේ දිය නෑමට ගිය පාසල් සිසුවකු දියේ ගිලී මරණයට පත්ව ඇත. මරණයට පත්වූ සිසුවාගේ වයස 16කි.
මෙසේ දියේ ගිලී මරණයට පත්ව ඇත්තේ මාතලේ සාන්ත තෝමස් විද්‍යාලයේ 11 වසරේ ඉගෙනුම ලබන මෙවර අපොස සාමාන්‍ය පෙළ විභාගයට පෙනී සිටීමට නියමිත මාතලේ කවුඩුපැලැල්ල ගල්වඩුකුඹුර ප්‍රදේශයේ පදිංචි ටිනුර ලක්ෂිත බණ්ඩාරනායක නමැති පාසල් සිසුවා බව පොලිසිය කියයි.
මරණයට පත් වූ පාසල් සිසුවා සමඟ තවත් මිතුරකු බන්ඩරපොළ සේරුගොල්ල අමුණේ දිය නෑමට ගොස් ඇති අතර මොවුන් දෙදෙනා දිය නෑමට පෙර බියර් පානය කර ඇති බව ද පැවැසේ. අනතුරුව සේරුගොල්ල අමුණට බැස දිය නා ගොඩට පැමිණීමට සූදානම් වන අවස්ථාවේදී පය ලිස්සා යාමෙන් පොකුණක් සහිත ප්‍රදේශයට ඇද වැටුණු බව ඔහු සමඟ ගිය අනෙක් තරුණයා පොලිසියට පවසා ඇත.
මෙම සිද්ධියෙන් මියගිය සිසුවාගේ පියා කන්කසන්තුරේ පොලිස් ස්ථානයේ සේවය කරනු ලබන උප පොලිස් පරීක්ෂකවරයෙකි.
සිද්ධිය පිළිබඳ වැඩිදුර පරීක්ෂණ කටයුතු කන්දෙනුවර පොලිසිය විසින් සිදු කරනු ලබයි.