රනිල් ජනපති වීම රටේ වාසනාවක්
Friday, 02 February 2024 - 8:02 am
රනිල් වික්‍රමසිංහ මහතා ජනපති වීම රටේ වාසනාව විය හැකි බවත් කවදාවත් දේශපාලනඥයකු නොකරන විශාල වෙනස්කම් ඔහු සිදු කර තිබෙන බවත් ශ්‍රී ලංකා නිදහස් පක්ෂයේ ජාතික සංවිධායක, පාර්ලිමේන්තු මන්ත්‍රී දුමින්ද දිසානායක මහතා පැවසීය. මීට අවුරුදු 20කට පෙර මේ වෙනස්කම් සිදු කළේ නම් අද අප මේ වගේ තත්ත්වයකට පත් නොවන බව ද හෙතෙම අනුරාධපුර සල්ගාදු පිටියේදී පැවැති ජයගමු ශ්‍රී ලංකා දීපව්‍යාප්ත ජනතා ජංගම සේවයේ සමාරම්භක උළෙලට එක් වෙමින් පෙරේදා (31) කීවේය.
රනිල් වික්‍රමසිංහ මහතාට විරුද්ධව අපි වැඩ කළා 2015 වෙනකල්. 2015න් පස්සේ තමයි අප එකතු වුණේ. හැබැයි 2015 වෙනකල් එතුමාට අප බෑ කියලා කිව්වා. එතුමාට හැමෝම කියනවා නිකන් ජනාධිපති වුණා කියලා. ඒක වාසනාව වෙන්න ඇති. සමහර විට රටේ වාසනාවත් වෙන්න ඇති. හැබැයි එතුමා කවදාවත් දේශපාලනඥයකු නොකරන විශාල වෙනස්කම් කරලා තියෙනවා. මේ වෙනස්කම් ටික මීට අවුරුදු 20කට කලින් කළා නම්, නීති රීති වෙනස් කරන එකේ ඉඳන් මේ හැම දේම මීට අවුරුදු 20කට කලින් අපි කළා නම් අද වගේ තත්ත්වයකට අප පත් වෙන්නේ නෑ. හැබැයි කාටවත් මේක තේරුණේ නෑ. මේ පරිවර්ථනය මේ වෙලාවේ හරි කළේ නැත්නම් අපේ දරුවන්ගේ අනාගතය ඉදිරියේදීවත් සුබවාදී කර ගන්න බැරි වෙනවා. සමහර වෙලාවට ගන්න තීරණ රජයේ නිලධාරීන්, ජනතාව සතුටු නොවන තීන්දු වෙන්න පුළුවන්. හැබැයි මේවා කොහෙන් හරි පටන් ගන්න ඕනෑ. ඒ නිසා රනිල් වික්‍රමසිංහ මැතිතුමන්ට අපි ස්තූතිවන්ත වෙනවා. අපි හැමෝම විරුද්ධ වුණත්, සමහර විරෝධයන් නොතකා කටයුතු කිරීම පිළිබඳව. වෙනස් විය යුතු තැන් වෙනස් කළ යුතු වෙනවා. යැයිද කීවේය.
