ජාතික ජන බලවේගයේ හතරලියද්ද ප්‍රදේශයේදී පැවැති මහජන හමුවක් අවස්ථාවකදී ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා සභාව අමතමින් මෙරට වත්මන් ව්‍යවස්ථාව පිළිබඳ පැහැදිලි කරමින් වත්මන් ජනාධිපති රනිල් වික්‍රමසිංහ හිරේ යායුතු යැයි පවසනවාත් සමඟම ප්‍රදේශයම බිය ගන්වමින් ඇතිවූ දැවැන්ත අකුණක් ගැසීම නිසා වේදිකාවේ මයික්‍රෆෝන පිලිස්සීමක් සිදු විය. හතරලියද්ද නගර මධ්‍යයේදී පෙරේදා (11දා) ටිල්වින් සිල්වාගේ ප්‍රධානත්වයෙන් විශාල ජනතාවකගේ සහභාගිත්වයෙන් මෙම රැස්වීම පැවැත්විණි. එහිදී ප්‍රධාන දේශනය කරමින් ටිල්වින් සිල්වා මෙරට වත්මන් ව්‍යවස්ථාව විග්‍රහ කරමින් ව්‍යවස්ථාවට අනුව ජනාධිපතිවරණය කිසිසේත් කල් දැමිය නොහැකි බවත් ජනාධිපති තනතුර දරන කාලය තුළදී ජනාධිපතිවරයාට යම් අනතුරක් සිදු වුවහොත් ජනාධිපති තනතුර අගමැතිවරයාට හිමි වන බවත් පැවැසීය.

ඉන් අනතුරුව ඔහු පවසා සිටියේ, වත්මන් ජනාධිපති රනිල් වික්‍රමසිංහ ඒ අයුරින් අකාලයේ මිය නොයන ලෙස ප්‍රාර්ථනා කරන බවත් ඔහු පරාජය විය යුතු බවත් පරාජය වනතෙක් ජීවත් විය යුතු බවත් ඒ වගේම හිරේ යා යුතු බවත් ප්‍රචාරක ලේකම් ටිල්වින් සිල්වා පවසනවාත් සමඟම සවස 5.05ට පමණ ප්‍රදේශයම භීතියට පත් කරවමින් විශාල අකුණක් පුපුරා ගිය අතර ඒ සමඟම වේදිකාවේ මයික්‍රෆෝන සියල්ලම අක්‍රිය වී ඇනහිටීය. වේදිකාවේ මයික්‍රෆෝන නැවත යථා තත්ත්වයට පත් කරනතුරු විනාඩි 10ක පමණ කාලයක් ටිල්වින් සිල්වාට බලා සිටීමටද සිදු විය.