පසුගිය වසරේ දිවයින පුරා ළමා අපයෝජන 9436 ක් වාර්තා වෙලා
Tuesday, 30 July 2024 - 9:38 am
පසුගිය වසරේ දිවයින පුරා ළමා අපයෝජන සිද්ධීන් 9436ක්ද ළමයින් සම්බන්ධ වෙනත් අපරාධ 1714ක්ද වාර්තාවී ඇතැයි ළමාරක්ෂක නිලධාරි ගීත් ප්‍රේමරත්න මහතා පැවසීය.
ඒ මහතා මේ බව පැවසුවේ අන්තර්ජාල ආරක්ෂණය සහ සයිබර් සුරැකුම පිළිබඳව ජනතාව දැනුවත් කිරීම සඳහා ගාල්ලේ පැවති වැඩ සටහනකදීය.
මෙම අපයෝජනවලින් වැඩිම සංඛ්‍යාවක් වාර්තාවී ඇත්තේ බස්නාහිර පළාතෙනි. කොළඹ දිස්ත්‍රික්කයෙන් වාර්තාවී ඇති ළමා අපයෝජන සංඛ්‍යාව 1124කි. ගම්පහ දිස්ත්‍රික්කයෙන් ළමා අපයෝජන 907ක්ද කළුතර දිස්ත්‍රික්කයෙන් 548ක්ද වාර්තා වී ඇත. කුරුණෑගල දිස්ත්‍රික්කයෙන් 760ක්ද රත්නපුර දිස්ත්‍රික්කයෙන් 598ක්ද ගාල්ල දිස්ත්‍රික්කයෙන් 541ක්ද වාර්තාවී ඇත.
මෙයට අමතරව පසුගිය වසරේ බාල වයස්කාර ස්ත්‍රි දූෂණ 50ක්ද ළමා ගැබ් ගැනිම් 53ක්ද ගබ්සා කිරීම් තුනක්ද වාර්තාවී ඇත. එයට අමතරව මත්ද්‍රව්‍යවලට ඇබ්බැහිවු ළමයින් 125ක් වාර්තාවී ඇති බවද ඒ මහතා පෙන්වා දුන්නේය. ගෘහස්ථ ප්‍රචණ්ඩත්වය, ළමා මෙහෙකාර සේවය, ළමා විවාහ, පාසල් නොයැවීම, සයිබර් අපරාධ ඇතුලු ළමයින් සම්බන්ධව පසුගිය වසරේ වාර්තාවී ඇති අපරාධ සංඛ්‍යාව 1714කි.
මෙහිදී ඒ මහතා පෙන්වා දුන්නේ අන්තර් ජාලය හරහා විවිධ ඉල්ලීම් කරමින් කරනු ලබන බලපෑම්ද වැඩිවී ඇති බවය. ඒ අතර නිරුවත් ඡායාරූප අන්තර් ජාලයට මුදාහරින බව පවසා කාන්තාවන්ගෙන් මුදල් ඉල්ලීම,දෙදෙනා ලිංගිකව හැසිරුණ විඩියෝ දර්ශන මිතුරන්ට පෙන්වන බව පවසා විවිධ බලපෑම් කිරීම, පොලිසියට නොයන ලෙස බලපෑම් කිරීම ආදිය වන බවද ඒ මහතා පෙන්වා දුන්නේය.
ඒ නිසා දෙමව්පියන් විශේෂයෙන්ම තරුණ දරුවන්, පාසල් සිසුන් පිළිබඳ දැඩි අවධානය යොමුකළ යුතුව ඇතැයිද දරුවන්ගේ ජංගම දුරකතන භාවිතය පිළිබඳව සැළකිලිමත් වියයුතු බවද ඒ මහතා වැඩිදුරටත් කියා සිටියේය.
අහංගම – සුගතපාල දීයගහගේ
