අගමැති ඇතුළු කැබිනට්ටුවට නොතීසි
Tuesday, 30 July 2024 - 9:41 am
ගුවන්තොටේ විද්‍යුත් වීසා ක්‍රමයට එරෙහි පෙත්සම් 2දා කැඳවයි
ගුවන්තොටුපළ ආශ්‍රිතව ක්‍රියාත්මක වීමට නියමිත විද්‍යුත් වීසා ක්‍රමවේදය මගින් රටේ ජාතික ආරක්ෂාවට සම්බන්ධ වැදගත් තොරතුරු ලෝකයට විවෘත වීමේ අවදානමක් මතුව ඇති බැවින් එම ක්‍රමවේදය බල රහිත කිරීමේ නියෝගයක් නිකුත් කරන්නැයි ඉල්ලා ගොනු කර තිබෙන මූලික අයිතිවාසිකම් පෙත්සම් සලකා බැලීමට අගෝස්තු 02 දා කැඳවන ලෙස දින නියම කළ ශ්‍රේෂ්ඨාධිකරණය අග්‍රාමාත්‍ය දිනේෂ් ගුණවර්ධන මහතා ඇතුළු අමාත්‍ය මණ්ඩලයට නොතීසි යවන ලෙස ද නියෝග කළේය.
මෙම සිද්ධියට සෘජුව සම්බන්ධ අමාත්‍යවරුන්ට පෞද්ගලිකව නොතීසි භාරදෙන ලෙස ද සෙසු ඇමැතිවරුන්ට භාරදීම සඳහා අමාත්‍ය මණ්ඩල ලේකම්වරයා වෙතට නොතිසී භාර දෙන ලෙස ද අධිකරණයෙන් පෙත්සම්කාර පාර්ශ්වයන්ට නියෝග කෙරිණි.
ශ්‍රේෂ්ඨාධිකරණ විනිසුරුවරුන් වන ප්‍රීති පද්මන් සූරසේන, අර්ජුන ඔබේසේකර සහ අචල වෙන්ගප්පුලි යන මහත්වරුන් හමුවේ පෙත්සම් කැඳවන ලදී. පාර්ලිමේන්තු මන්ත්‍රීවරුන් වන පාඨලී චම්පික රණවක, රවුෆ් හකීම් සහ එම්. ඒ. සුමන්තිරන් යන මහත්වරුන් විසින් මෙම පෙත්සම් ගොනු කර තිබේ.
මෙතෙක් පැවති ක්‍රමය වෙනස් කරමින් විදෙස් සමාගම් ඇසුරෙන් විද්‍යුත් වීසා සේවාව ලබා ගැනීමට අමාත්‍ය මණ්ඩලය තීරණය කර ඇතැයි පවසන පෙත්සම්කරුවෝ මෙම විද්‍යුත් වීසා ක්‍රමවේදය හේතුවෙන් රටේ වැදගත් ආරක්ෂක තොරතුරු හෙළි වීමේ අවකාශයක් ඇති බවත් එමඟින් රටේ ආරක්ෂාවට තර්ජනයක් එල්ල විය හැකි බවත් අවධාරණය කරති.
මෙම තීරණය ජාතික ආරක්ෂාවට තර්ජනයක් වන අතර සංචාරක ව්‍යාපාරයට විශාල බලපෑමක් බවත් වීසා ගාස්තු ඉතා ඉහළ යන බවක් මහ ජනතාවට රජය කෙරෙහි විශ්වාසය බිඳී යන බවත් පෙත්සම්කරුවෝ වැඩිදුරටත් කියා සිටිති. මෙම තත්ත්වය තුළින් ජනතාවගේ මූලික අයිතිවාසිකම් කඩවන බව පවසන පෙත්සම්කරුවන් අදාළ අමාත්‍ය මණ්ඩල තීරණය බල රහිත කරන නියෝගයක් නිකුත් කරන ලෙස පෙත්සම් මඟින් ඉල්ලා තිබේ.
එමෙන්ම පෙත්සම විභාගයට ගෙන අවසන් වන තෙක් අදාළ තීරණය ක්‍රියාත්මක වීම වළකාලමින් අතුරු තහනම් නියෝගයක් නිකුත් කරන ලෙස ද පෙත්සම්කරුවෝ සිය පෙත්සමෙන් ඉල්ලා සිටිති. පෙත්සම්වල වගඋත්තරකරුවන් ලෙස ආගමන විගමන පාලකවරයා සහ නීතිපතිවරයා ඇතුළු පාර්ශ්ව 32ක් නම් කර තිබේ.
ඒ.ජේ.ඒ. අබේනායක
.webp)
