ඉන්දීය ධීවර යාත්‍රා පළවා හැරීමට විශේෂ මෙහෙයුමක්
Sunday, 17 March 2024 - 4:25 pm
2024 වසරේ මේ දක්වා ශ්‍රී ලංකා නාවික හමුදාව විසින් ශ්‍රී ලංකා මුහුදු සීමාවේදී ඉන්දීය දඩයම් ට්‍රෝලර් යාත්‍රා 18ක් සහ ඉන්දීය ධීවරයින් 146ක් අත්අඩංගුවට ගෙන ඇත.
නවතම සිදුවීමක් ලෙස ඩෙල්ෆ්ට් දූපතට ඔබ්බෙන් වූ ශ්‍රී ලංකා මුහුදු සීමාවේ ධීවර කටයුතුවල නිරත වූ ඉන්දීය ධීවරයින් 21 දෙනෙකු ඉන්දීය ට්‍රෝලර් යාත්‍රා දෙකක් අත්අඩංගුවට ගැනීමට නාවික හමුදාව සමත් විය.
නාවික හමුදාව පැවසුවේ, ඊයේ අඳුරේදී ඉන්දීය ධීවර යාත්‍රා ශ්‍රී ලංකා මුහුදු සීමාවෙන් පළවා හැරීම සඳහා විශේෂ මෙහෙයුමක් ක්‍රියාත්මක කළ අතර, මෙම මෙහෙයුමේදී අත්අඩංගුවට ගත් බව ය.
විදේශීය ට්‍රෝලර් යාත්‍රා වල නීතිවිරෝධී ධීවර කටයුතු මැඩලීම සඳහා ශ්‍රී ලංකා නාවික හමුදාව ශ්‍රී ලංකා මුහුදු සීමාවේ නිරන්තර මුර සංචාර සහ මෙහෙයුම් අඛණ්ඩව සිදු කරනු ලබන්නේ දේශීය ධීවරයින්ගේ ජීවනෝපාය කෙරෙහි එම ක්‍රියාවලීන්ගේ බලපෑම සැලකිල්ලට ගනිමින්.
අත්අඩංගුවට ගත් ට්‍රෝලර් යාත්‍රා සහ ඉන්දීය ධීවරයින් 21 දෙනෙකු කන්කසන්තුරේ වරාය වෙත රැගෙන ඒමෙන් අනතුරුව ඉදිරි නීතිමය කටයුතු සඳහා මයිලඩි ධීවර පරීක්ෂක වෙත භාර දීමට කටයුතු කෙරිණි.
