Local

සිවිල් ආරක්‍ෂක වාහන 108ක් ‘මිසින්’

Sunday, 20 October 2024 - 10:20 pm

සිවිල් ආරක්ෂක දෙපාර්තමේන්තුව සතුව තිබූ වාහන 108ක් එම දෙපාර්තමේන්තුවේ නොමැති බව ජාතික විගණන කාර්යාලය මගින් නිකුත් කර ඇති විගණන වාර්තාවක සඳහන් වෙයි.

මෝටර් රථ ප්‍රවාහන දෙපාර්තමේන්තුවේ සිවිල් ආරක්ෂක දෙපාර්තමේන්තුව නමින් ලියාපදිංචි වාහන 128ක් පැවැති අතර ඉන් වාහන 108ක් දෙපාර්තමේන්තුවේ පවතින බවට සාක්ෂි විගණනයට ඉදිරිපත් වී නොතිබුණි.

එමෙන්ම සිවිල් ආරක්ෂක දෙපාර්තමේන්තුවේ ප්‍රවාහන සහ ගිණුම් අංශය යන අංශයන් දෙකෙහිම පැවැති වාහන 444ක් අතුරින් වාහන 82ක් මෝටර් රථ ප්‍රවාහන දෙපාර්තමේන්තුවේ ලියාපදිංචි වී නොතිබුණි. එසේ ලියාපදිංචි වී නැති වාහනවල වටිනාකම රුපියල් දාහතර කෝටි එක්ලක්ෂ තිස්පන්දහසකි.

සිවිල් ආරක්ෂක දෙපාර්තමේන්තුව සම්බන්ධයෙන් 2023 වර්ෂයට අදාළව නිකුත් කර ඇති කාර්යසාධන විගණන වාර්තාවේ මෙම තොරතුරු ඇතුළත්ව ඇත.