Local

ජනාධිපති ආරක්‍ෂක රියදුරෙක් කහ ඉර උඩ පුද්ගලයෙකු හප්පයි.. බරපතලව ICU…

Saturday, 26 October 2024 - 6:01 pm

මහබාගේ ප්‍රදේශයේදී පදික මාරුවකින් පාර මාරුවෙමින් සිටි පුද්ගලයෙකු හප්පා බරපතල තුවාල සිදු කරන ලදැයි චෝදනා එල්ල වූ ජනාධිපති ආරක්ෂක අංශයේ පොලිස් රියදුරකු අනිද්දා දින දක්වා රක්ෂිත බන්ධනාගාර ගත කර තිබේ.

වැලිසර මහේස්ත්‍රාත් අධිකරණය විසින් මෙම නියෝගය නිකුත් කරමින් ඔහුගේ රියැදුරු බලපත්‍රය නැවත දැනුම් දෙනතුරු අත්හිටුවා ඇත.

ඉකුත් 24 වැනිදා රාත්‍රී 11ට පමණ මහබාගේ හන්දියේ පදික මාරුව මත මෙම අනතුර සිදුවී ඇත.

මහාබාගේ පොලිසිය අධිකරණයට දැනුම් දී තිබුණේ සැකකාර රියදුරාගේ නොසැලකිලිමත් ලෙස රිය පදවමින් මෙම අනතුර සිදුකර ඇති බවයි.

තුවාල ලැබූ පුද්ගලයා කොළඹ ජාතික රෝහලට මාරුකර යවා ඇති අතර ඔහු එහි දැඩි සත්කාර ඒකකයේ ප්‍රතිකාර ලබයි.