මේ වන විට ඇතිවෙ‍මින් පවතින පරිවර්තනය ජනතාවට දැනෙන්නට පටන්ගෙන ඇති බව අමාත්‍ය වෛද්‍ය නලින්ද ජයතිස්ස පවසනවා.
ජනතාවට ආර්ථිකයේ යම් සහනයක් මේ වන විට ලබාදී ඇති බවත්, රාජ්‍ය අංශයට හා පෞද්ගලික අංශයට හොඳ වැටුප් වැඩිවීමක්ද ලැබුණු බවයි අද (16) මාධ්‍ය වෙත අදහස් දක්වමින් අමාත්‍යවරයා සඳහන් කළේ.
අල්ලස් කොමිසම මේ වන විට යළි සක්‍රීය වී ඇති බවද, පසුගිය කාලයේ යට ගිය ලිපි‍ගොනුවල පරීක්ෂණ යළි ආරම්භ වී ඇති බවද, එසේම අපරාධ පරීක්ෂණ දෙපාර්තමේන්තුව ද යළි විමර්ශන ආරම්භ කර ඇති බවද ඔහු පැවසුවා.
එසේම, නීතිය සම්බන්ධයෙන් ක්‍රියාත්මක වීම අදාළ ආයතනවලින් සිදුකරන බවත්, රජය මඟින් සිදු කරන්නේ එම ආයතනවලට පහසුකම් සැලසීම පමණක් බවත් අමාත්‍යවරයා සඳහන් කළා.
පිල්ලෙයාන්ගේ නීතීඥයා බවට පත්ව ඇත්තේ හිටපු පාර්ලිමේන්තු මන්ත්‍රී උදය ගම්මන්පිල බවත්, ගම්මන්පිල නඩු කතා කරන ආකාරය රටේ ජනතාව දැක නොමැති බවත්, මේවා නිකම්ම නිකම් ඝාතන නොව දේශපාලන කුමන්ත්‍රණ බවයි අමාත්‍ය වෛද්‍ය නලින්ද ජයතිස්ස වැඩිදුරටත් ප්‍රකාශ කර සිටියේ.
.webp)
