වැඩිම සංචාරකයින් පිරිසක් මේ වසරේ සිංහරාජය නරඹයි
Saturday, 03 August 2024 - 11:52 am
ලෝක උරුම සිංහරාජ වනාන්තරය නැරඹීම සඳහා වැඩිම දෙස් විදෙස් සංචාරකයන් පිරිසක් මේ වසරේ පැමිණ ඇති බව වන සංරක්ෂණ දෙපාර්තමේන්තුව ප්‍රකාශ කළා. මේ වසරේ ගතවූ කාලය තුළ සංචාරකයින් 35,000කට වැඩි පිරිසක් පැමිණ ඇති අතර, එමගින් විශාල ආදායමක්ද හිමිව තිබෙනවා. මේ පිළිබද කරුණු අනාවරණය වූයේ රාජ්‍ය අමාත්‍ය ලසන්ත අලගියවන්නගේ සභාපතිත්වයෙන් රජයේ ගිණුම් පිළිබඳ කාරක සභාව පසුගියදා පාර්ලිමේන්තුවේදී රැස්වූ අවස්ථාවේදීයි. සංචාරකයින් වැඩි වශයෙන් ආකර්ෂණය කරගැනීම සඳහා පරිසර පද්ධතිය ආරක්ෂා කරගනිමින් පහසුකම් වැඩිදියුණු කිරීමටද පියවර ගන්නා බවයි වන සංරක්ෂණ දෙපාර්තමේන්තුව කියා සිටියේ. මේ අතර ගැසට් මගින් ප්‍රකාශයට පත් නොකරන ලද හෙක්ටයාර ලක්ෂ 2 කට වැඩි වනාන්තර හැකි ඉක්මණින් ගැසට් මගින් ප්‍රකාශයට පත් කරන ලෙස රජයේ ගිණුම් කාරක සභාව වන සංරක්ෂණ දෙපාර්තමේන්තුවට උපදෙස් ලබාදී තිබෙනවා.
