Local

ප්‍රදේශ කිහිපයකින් අයිතිය නැති වාහන හමුවෙයි

Monday, 14 October 2024 - 9:18 am

නුවරඑළිය නගරයේ නිවසක ගාල් කර තිබූ සැකසහිත ජීප් රථයක් නුවරඑළිය පොලීසිය ඊයේ (12) සිය භාරයට ගෙන තිබේ.

හිටපු කැබිනට් ඇමතිවරයෙකුගේ ඥාතියෙකුගේ නිවසේ රථය ගාල් කර තිබූ අතර පොලිස් භාරයට ගන්නා අවස්ථාවේ ඊට අදාළ නීත්‍යනුකූල ලියවිලි කිසිවක් නොතිබූ බව පොලීසිය පවසයි.

මේ අතර පැල්මඩුල්ල පාතකඩ ප්‍රදේශයේ ගරාජයක වසර ගණනාවක සිට නවතා තිබූ ජීප් රථයක් සහ මෝටර් රථයක් පැල්මඩුල්ල පොලීසිය අද (13) සිය භාරයට ගෙන තිබුණි.

එම වාහන හම්බන්තොට දිස්ත්‍රික්කයේ දේශපාලකයෙකුගේ හිතවතෙක් ගරාජයට ගෙන එන්නට ඇති බවට සැක පළ කරන අතර පොලිස් පරීක්ෂණ ආරම්භ කර ඇත.

එමෙන්ම ඕපනායක පල්ලෙකන්ද පාසල් පාර කැන්දේකැටිය ප්‍රදේශයේ නිවෙසක නවතා තිබූ සුඛෝපභෝගී ජීප් රථයක් 1997 දුරකථන අංකයට ලද තොරතුරක් මත ඕපනායක පොලීසිය විසින් සිය භාරයට ගනු ලැබීය.

පොලීසිය පැවසුවේ, එහි චැසි අංකයට අදාළ වාහනයක් මෝටර් රථ ප්‍රවාහන දෙපාර්තමේන්තුවේ ලියාපදිංචි කර නොමැති බවය.