චීන රජයේ ආධාර නිවාස ව්‍යාපෘතිය කඩිනමින් අරඹන්න උපදෙස්
Sunday, 28 January 2024 - 10:27 am
චීන රජයේ ආධාර මත අඩු ආදායම්ලාභීන්, කෘතහස්ත කලාකරුවන් හා මාධ්‍යවේදීන් වෙනුවෙන් ඉදිකිරීමට නියමිත නිවාස 1,996 යේ ව්‍යාපෘතිය ආරම්භ කිරීම කඩිනම් කරන්නැයි නාගරික සංවර්ධන හා නිවාස අමාත්‍ය ප්‍රසන්න රණතුංග මහතා නිලධාරින්ට උපදෙස් දෙයි.
ඔහු මෙහිදී අවධාරණය කළේ මාර්තු මස මුලදී මෙහි ඉදිකිරීම් කටයුතු ආරම්භ කිරීමට අපේක්ෂා කරන බවයි.
ඊට පෙර මෙම ව්‍යාපෘතියේ මූලික කටයුතු චීන රජයේ නියෝජිතයින් සමඟ සාකච්ඡා කර අවසන් කරන ලෙස අමාත්‍යවරයා නිලධාරින්ට උපදෙස් දුන්නේය.
අමාත්‍යවරයා මේ බව කියා සිටියේ නාගරික සංවර්ධන අධිකාරි ශ්‍රවණාගාරයේදී පැවැති සාකච්ඡාවකට සිකුරාදා (26) දින සහභාගී වෙමිණි.
වසර තුනක් තුළ ඉදි කෙරෙන මෙම නිවාස 1,996 න් නිවාස 1,888 ක් කොළඹ ජීවත්වන අඩු ආදායම්ලාභීන්ටත්, නිවාස 108ක් මෙරට කෘතහස්ත කලාකරුවන් හා මාධ්‍යවේදීන් සඳහාත් වෙන් කෙරේ.
ඒ අනුව පෑලියගොඩ දුටුගැමුණු පාර නිවාස 615ක්, දෙමටගොඩ එළුමඩුව වත්ත නිවාස 586 ක්, මොරටුව බැටරි වත්ත, නිවාස 575 ක්, මහරගම අඹවත්ත නිවාස 112 ක් සහ කොට්ටාව පළතුරුවත්ත නිවාස 108ක් වශයෙන් ඉදි කෙරෙනවා. කලාකරුවන් සහ මාධ්‍යවේදීන් සදහා වෙන් කරන්නේ කොට්ටාව පළතුරුවත්ත නිවාස 108යි.
චීන රජය විසින් මෙම ව්‍යාපෘතිය සඳහා යුවාන් මිලියන 552ක මූල්‍යාධාරයක් ලබාදෙන අතර එය ආසන්න වශයෙන් ශ්‍රී ලංකා මුදලින් රුපියල් බිලියන 24.48කි.
මෙම නිවාස ව්‍යාපෘතිය ස්ථාන 08ක ඉදිකිරීම් සිදු කෙරෙන අතර එයින් ස්ථාන දෙකක් සඳහා මේ වනවිට කැබිනට් අනුමැතිය හිමිව ඇත.
අනෙක් ස්ථානවල තිබූ විවිද ගැටළු නිසා එම ස්ථාන කිහිපය කැබිනට් මණ්ඩලයට ඉදිරිපත් කර නොතිබූ අතර එම ගැටළුවලට විසදුම් ලැබී ඇති හෙයින් එම ස්ථාන කැබිනට් මණ්ඩලයට ඉදිරිපත් කර අනුමැතිය ලබා ගන්නා මෙන් අමාත්‍යවරයා නිළධාරින්ට උපදෙස් දුන්නේය.
මෙම නිවාස ව්‍යාපෘතිය ඉදිකිරීම සඳහා චීන රජය විසින් ලබා දෙන කොන්ත්‍රාත් සමගම් 05 මෙරටට ලබා දීමට නියමිතය. ඒ ආයතන 05 කඩිනමින් ලබා ගැනීමටත් මෙහිදී තීරණය විය.
මෙම අවස්ථාවට නාගරික සංවර්ධන හා නිවාස අමාත්‍යාංශයේ ලේකම් ඩබ්ලිව්.එස්. සත්‍යානන්ද, නාගරික සංවර්ධන අධිකාරියේ අධ්‍යක්ෂ ජනරාල් ප්‍රසාද් රණවීර යන මහත්වරු ඇතුළු නිලධාරීන් පිරිසක් සහභාගී වූහ.
