රජයේ සේවකයන් වෙනුවෙන් නව චක්‍රලේඛයක් නිකුත් වෙයි
Thursday, 11 January 2024 - 5:37 pm
රාජ්‍ය සේවයේ නිරතවන සේවකයන් වෙනුවෙන් නව චක්‍රලේඛයක් නිකුත් කර තිබෙනවා
මෙම චක්‍රලේඛය අනුව කාර්යාලගතව සේවය කරන රජයේ සේවකයන් උදෑසන 8.30 සිට සවස 4.15 දක්වා කාර්යාලවල රැඳී සිටිමින් සිය රාජකාරි කටයුතු කිරීම අනිවාර්ය කර තිබෙනවා
එමෙන්ම පස්වරු 3.00 දක්වා රජයේ කාර්යාල මුදල් ගනුදෙනු සඳහා විවෘතව තැබිය යුතු අතර මහජනතාවට සේවය සැපයීමේදී ගැටලු ඇතිනොවන සේ ආචාරශීලීව කටයුතු කළ යුතු බවද එහි සඳහන් වනවා .
ඊට අමතරව රාජකාරි කාලය තුළදී සිය කාර්යාල හැඳුනුම්පත පැළඳ සිටීම හා නිල ඇඳුම් දීමනා ලබන සියලුම රාජ්‍ය නිලධරයන් සිය නිල ඇඳුමින් සැරසී පැමිණිය යුතුයි.
මහජන දිනය ලෙස වෙන් කර ඇති සඳුදා දිනය තුළ සෑම රාජ්‍ය ආයතනයකම පහළ මට්ටමේ නිලධාරියාගේ සිට අමාත්‍යාංශ ලේකම්වරයා දක්වා වූ සෑම තරාතිරමකම නිලධාරීන් කාර්යාලයේ රැඳීසිටීම අත්‍යවශ්‍ය බවද අදාළ චක්‍රලේඛයේ සඳහන් වන අතර එදිනට අසනීප හෝ නොවැළැක්විය හැකි කරුණක් වෙනුවෙන් හැර වෙනත් අවශ්‍යතා සඳහා නිවාඩු අනුමත නොකිරීමට ආයතන ප්‍රධානියා වගබලා ගත යුතු වනවා .
මෙදිනට වෙනත් රැස්වීම් වැඩමුළු හා උත්සව ආදිය සංවිධානය නොකළ යුතු බව ද ඒවා සඳහා සහභාගිවීමටද කාර්යාලයෙන් බැහැරව නොයා යුතු බව ද දන්වා තිබෙනවා
රජයේ නිලධාරීන් සේවයට පැමිණීමේදි රාජ්‍ය සේවයේ ගරුත්වය රැකෙන පරිදි සුදුසු සංවරශීලි ඇඳුමකින් සැරසී පැමිණිය යුතු බව ද මෙම චක්‍රෙල්ඛයේ වැඩිදුරටත් සඳහන් වන අතර එම චක්‍රලේඛය පහතින් කියවිය හැකියි
.webp)
