නාරම්මල ප්‍රදේශයේ දී වෙඩි වැදීමකින් මිය ගිය ලොරිරථයේ රියදුරුගේ පවුලේ ඥාතීන් වෙත වැඩබලන පොලිස්පති දේශබන්දු තෙන්නකෝන් මහතා විසින් රුපියල් මිලියනයක මුදලක් පරිත්‍යාග කර ඇත.

එසේම ඊයේ (19) සිට ක්‍රියාත්මකවන පරිදි මෙම සිද්ධියට සම්බන්ධ උපපොලිස් පරීක්ෂකවරයා සහ පොලිස් කොස්තාපල්වරයාගේ වැඩ තහනම් කළ බව පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරී නිහාල් තල්දූව මහතා සඳහන් කළේය.

අණ නොතකා ධාවනය කළ ලොරි රථයක් හඹාගෙන ගොස් එම ලොරි රථය නැවැත්වූ අවස්ථාවේ උපපොලිස් පරීක්ෂකවරයා සතු ගිනිඅවිය ක්‍රියාත්මක වී ලොරි රථයේ රියදුරාට වෙඩි වැදී ජීවිතක්ෂයට පත් වී තිබිණි.

මෙම වෙඩි තැබීමෙන් මිය ගියේ ලොරි රථ රියදුරෙකු වන 41 හැවිරිදි තිදරු පියෙකි. ඔහු මහරච්චිමුල්ල – වෑත්තෑකන්ද ප්‍රදේශයේ පදිංචිකරුවෙක් ය.

මේ සම්බන්ධයෙන් උපපොලිස් පරීක්ෂකවරයා අත්අඩංගුවට ගත් අතර, ඔහු නාරම්මල මහේස්ත්‍රාත් අධිකරණයට ඉදිරිපත් කිරීමෙන් අනතුරු ව ලබන 23 වැනිදා දක්වා රක්ෂිත බන්ධනාගාරගත කෙරිණි.

නාරම්මල වෙඩි තැබීමේ සිද්ධියේ දී පොලිස් නිලධාරීන් අත්තනෝමතික ලෙස ක්‍රියාකර ඇත්දැයි සොයා බැලීමට වැඩබලන පොලිස්පති දේශබන්දු තෙන්නකෝන් මහතා විසින් පොලිස් විශේෂ විමර්ශන ඒකකයේ කණ්ඩායමක් එම ප්‍රදේශයට යවා තිබේ.