මහනුවර ප්‍රදේශ කිහිපයකට පැය 65ක ජල කප්පාදුවක්
Wednesday, 25 September 2024 - 8:09 pm
ලබන 28 වැනිදා පැය 65ක කාලයක් මහනුවර දිස්ත්‍රික්කයේ ප්‍රදේශ කිහිපයකට ජල සැපයුම තාවකාලිකව අත්හිටුවන බව ජාතික ජල සම්පාදන හා ජලාපවාහන මණ්ඩලය දැනුම් දෙනවා.
පොල්ගොල්ල ජලාශයේ අත්‍යවශ්‍ය නඩත්තු කටයුත්තක් හේතුවෙන් අලුයම 1.00 සිට 30වැනි දින පස්වරු 6.00 දක්වා මෙලෙස අත්හිටුවනු ඇති.
ඒ අනුව මහනුවර නගර සභා බල ප්‍රදේශය, හාරිස්පත්තුව , පූජාපිටිය , පාතදුම්බර සහ අකුරණ ජල සම්පාදන කුමවලට අයත් ප්‍රදේශවලට මෙලෙස ජල සැපයුම අත්හිටුවනු ලබනවා.
එමෙන්ම කුණ්ඩලසාලේ ප්‍රාදේශීය ලේකම් කොට්ඨාසයට අයත් රජවැල්ල , සිරිමල්වත්ත, අම්පිටිය,අමුණූගම, හන්තාන සහ වලල යන ප්‍රදේශවල මෙන්ම විසල් මහනුව ජල පවිත්‍රාගාරයෙන් ජලය බෙදාහරින මාවතගම ප්‍රදේශයටද ජල සැපයුම අත්හිටුවෙන බව එම මණ්ඩලය වැඩිදුරටත් දැනුම් දෙනවා.
මේ පිළිබඳ වැඩිදුර තොරතුරු 1939 දුරකතන අංකයෙන් විමසීමක් කළ හැකි බවද ජල සම්පාදන හා ජලාපවාහන මණ්ඩලය වැඩිදුරටත් පැවසුවේ.
