ඉලෙක්ට්‍රෝනික ඡන්ද ප්‍රකාශ කිරීමේ ක්‍රමවේදය ඉදිරි මැතිවරණවල දී – ජනපති
Friday, 30 August 2024 - 6:20 am
ඉදිරි මැතිවරණ සඳහා ඉලෙක්ට්‍රෝනික ඡන්ද ප්‍රකාශ කිරීමේ ක්‍රමවේදය හඳුන්වා දෙන බව ජනාධිපති රනිල් වික්‍රමසිංහ මහතා පවසයි.
අද (29) පෙරවරුවේ එළිදක්වනු ලැබූ “රනිල් සමඟ රට දිනවන වසර පහක්” ප්‍රතිපත්ති ප්‍රකාශයේ 'ඩිඩිටල් මාවත' සැලැස්මෙහි ඔහු මේ බව සඳහන් කර ඇත.
එහි වැඩිදුරටත් මෙසේ සඳහන් වේ.
අනාගත ලෝකය හැඩ ගස්වන නවතම රැල්ල වන්නේ ඩිජිටල් තාක්‍ෂණය පදනම් කරගත් කෘත්‍රිම බුද්ධිය හා ස්වයංක්‍රීයකරණය යි. එය සෞඛ්‍ය, අධ්‍යාපන, මූල්‍ය, ආර්ථික ආදී සකලවිධ ක්‍ෂේත්‍රවල දියුණුවට පාදක වනවා.
ශ්‍රී ලංකාව ඩිජිටල් පරිවර්තනයකට ලක් කිරීම උදෙසා තාක්ෂණ ප්‍රවර්ධන පනත 2025 වසරේ අප සම්මත කරගන්නවා. මෙමගින් ඩිජිටල් පරිවර්තන ඒජන්සියක් සහ තාක්ෂණ සහ නවෝත්පාදන සභාවක් ස්ථාපිත කරනවා. ඊට පසුබිම සකසමින් මේ වන විටත් ශ්‍රී ලංකා විදුලි සංදේශ පනත අප සංශෝධනය කර තියෙනවා.
චන්ද්‍රිකා තාක්‍ෂණය පදනම් කරගත් අන්තර්ජාල සේවාවන් හදුන්වාදීම ඔස්සේ ඩිජිටල් විප්ලවය වේගවත් කරනවා.
අපේ රටත් අනාගත පරපුරත් මේ නවීන ප්‍රවණතාවන්ට එක් කිරීම සඳහා අප වහාම පියවර ගන්නවා. තරුණ තරුණියන් ඩිජිටල් දැනුමෙන් සන්නද්ධ කරනවා.
තවත් වසර තුනක් ඇතුළත මුළු රාජ්‍ය සේවයම කෘත්‍රිම බුද්ධිය හා ස්වයංක්‍රීයකරණය යටතට ගෙන ඒමේ සැලසුම් අප ක්‍රියාත්මක කරනවා. පූර්ණ ඊ-රාජ්‍ය සේවයක් (e-Gove ance) නිර්මාණය කරනවා.
වර්තමානයේ අපේ ඩිජිටල් ආර්ථික පංගුව ඩොලර් බිලියන 5 ක්. ඉදිරි පස් වසර තුළ එය ඩොලර් බිලියන 15 දක්වා ඉහළ නැංවීමට අවශ්‍ය ශක්තිමත් පදනම සකස් කරනවා.
කෘත්‍රිම බුද්ධිය ඔස්සේ වගකීම් විරහිත ලෙස ක්‍රියා කිරීම නවතාලන, එමෙන්ම කටහඬ, රූපය ආදියෙහි පුද්ගලිකත්වය හා බුද්ධිමය දේපල අයිතිය සුරකින නීති රීති සම්පාදනය කරනවා. මැඩ්රිඩ් ප්‍රොටොකෝල් ගිවිසුම (Madrid Protocol) ඔස්සේ වෙළෙඳ ලකුණු පිළිබඳ බුද්ධිමය අයිතිය සුරකිනවා.
ඩිජිටල් පුරවැසි හැදුනුම්පත් නිකුත් කිරීමේ කාර්යයට දැනටමත් මුල පුරා ඇති අතර, ඉදිරි මැතිවරණ සඳහා ඉලෙක්ට්‍රෝනික ඡන්ද ප්‍රකාශ කිරීම හදුන්වා දෙනවා.
