තහනම නොතැකූ සජබ පාගමනට පොලිසියෙන් ජල ප්‍රහාර-කඳුළු ගෑස්
Wednesday, 31 January 2024 - 9:59 am
සමගි ජන බලවේගය ඊයේ (30) කොළඹදී සංවිධානය කළ විරෝධතා පා ගමන අධිකරණ නියෝග කඩ කරමින් ගමන් කිරීමේදී පොලිසිය ජල හා කඳුළු ගෑස් ප්‍රහාරයක් එල්ල කර විසුරුවා හැරීමට කටයුතු කළේය.
කොළඹ විහාරමහාදේවි උද්‍යානය අසලදී ආරම්භ කළ විරෝධතාවට කොළඹ මහජන පුස්තකාලය සහ පුරහල අසලදී පොලිසිය මඟින් කඳුළු ගෑස් ප්‍රහාරයක් එල්ල කරනු ලැබීය.
ප්‍රජාතන්ත්‍රවාදය ශක්තිමත් කර රටේ ජනතාවට තිබෙන ආර්ථික පීඩනය අඩු කර ජනතාවට නිදහසේ ජීවත් වීමට ඉඩ සලසා දෙන්නැයි රජයට බල කරමින් කොළඹ විහාරමහාදේවි උද්‍යානය අසල සිට “වෙනසක් හදන වසරක් 2024” යන මැයෙන් විරෝධතා පාගමන ආරම්භ කර තිබිණි.
විරෝධතාව සඳහා විපක්ෂ නායක සජිත් ප්‍රේමදාස මහතා ඇතුළු විපක්ෂයේ පාර්ලිමේන්තු මන්ත්‍රීවරුන්, ආසන සංවිධායකයන්, වෘත්තීය සමිති සහ සිවිල් සංවිධාන නියෝජිතයන්, සමගි ජන බලවේගයේ සියලු කාන්තා හා තරුණ ශාඛා සමිති නියෝජිතයන් ඇතුළු පිරිසක් එක්ව සිටියහ.
විරෝධතාවට සහයෝගය පළ කරමින් ගොවීන්, ධීවරයන්, රාජය සේවකයන්, වෘත්තීය සමිති නියෝජිතයන්, සිවිල් සංවිධාන නියෝජිතයන්, දේශපාලන පක්ෂ ක්‍රියාකාරීන් ඇතුළු පිරිසක්ද එක්ව සිටියහ.
එම විරෝධතා පාගමන තහනම් කරමින් මාලිගාකන්ද සහ කොටුව මහේස්ත්‍රාත් අධිකරණවලින් පොලිසිය තහනම් නියෝග ලබාගෙන තිබිණි.
විරෝධතා පා ගමනක් හේතුවෙන් කොළඹ මහ නගර සභාව ආශ්‍රිත ප්‍රධාන මාර්ග රැසක දැඩි රථ වාහන තදබදයක් ඇති වී තිබිණි.
විරෝධතාවට එක්ව සිටි විපක්ෂ නායක සජිත් ප්‍රේමදාස මහතා ද ජල ප්‍රහාරයට ලක්වූ අතර හිටපු පාර්ලිමේන්තු දූෂණ විරෝධී බලවේගයේ ජාතික සංවිධායක මන්ත්‍රී මුජිබුර් රහුමාන් මහතා ඇතුළු අට දෙනකු තුවාල ලබා කොළඹ ජාතික රෝහලට ඇතුළත් කර තිබිණි. ඇමැති ආරක්ෂක කොට්ඨාසයට අනුයුක්ත නිලධාරියකු ද ප්‍රතිකාර සඳහා ජාතික රෝහලට ඇතුළත් කර තිබිණි.
කොළඹ නගර සභා පිටියට රැස්වූ විරෝධතාකරුවන් විපක්ෂ නායක සජිත් ප්‍රේමදාස මහතා විසින් අමතනු ලැබීය.
විරෝධතාව මැඬපැවැත්වීම සඳහා පොලිසිය මඟින් එල්ල කරන ලද කඳුළු ගෑස් සහ ජල ප්‍රහාර හේතුවෙන් තුවාල ලැබූ පුද්ගලයන් සම්බන්ධයෙන් සොයා බැලීමට විපක්ෂ නායක සජිත් ප්‍රේමදාස මහතා ඊයේ (30) පස්වරුවේ කොළඹ ජාතික රෝහලට පැමිණියේය.
එහිදී විපක්ෂ නායකවරයා විසින් විරෝධතාව අතරතුර තුවාල ලැබූ මන්ත්‍රීවරුන් සේම පාක්ෂිකයන්ගේ සුවදුක් සොයා බැලීමට කටයුතු කර තිබිණි.
.webp)
