අගමැතිගෙන් පුස්තකාලයාධිපතිවරුන්ට ඇගයීමක්
Wednesday, 30 October 2024 - 11:30 am
“පුස්තකාල සේවා නවීකරණය සඳහා කෘත්‍රිම බුද්ධියේ පැමිණීම – අභියෝග සහ අවස්ථා” යන තේමාව යටතේ ජාත්‍යන්තර පර්යේෂණ සම්මන්ත්‍රණයක් අද කොළඹදී පවත්වා තිබෙනවා.
පුස්තකාලයාධිපතිවරුන්, පර්යේෂකයන් සහ නවෝත්පාදකයින් පිරිසක් සහභාගී වූ මෙම සමුළුවට ප්‍රධාන ආරාධිතයා වශයෙන් අග්‍රාමාත්‍ය ආචාර්ය හරිනි අමරසූරිය සහභාගීවී ඇති බව සඳහන්.
එහිදී අග්‍රාමාත්‍යවරිය සඳහන් කර සිටියේ මෙම පිරිස පුස්තකාලාධිපතිවරුන් පමණක්ම නොවන බවත් දැනුම් සම්භාරයක භාරකරුවන් සහ ආරක්ෂකයින් මෙන්ම ඩිජිටල්කරණය වන අනාගතයේ මෙහෙයුම්කරුවන් පිරිසක්ද වන බවයි.
එසේම ඩිජිටල් ප්‍රවේශය ප්‍රගමනය කිරීමේදී පුස්තකාල සහ පුස්තකාලයාධිපතිවරුන්ගේ ප්‍රධාන කාර්යභාරය පිළිබඳවද අග්‍රාමාත්‍යවරිය සඳහන් කර සිටියා.
දැනුම සඳහා ප්‍රවේශය ප්‍රජාතන්ත්‍රීකරණය කිරීම සහ සීමා සහිත සම්පත් සහ සැකසුම් තුළ ධාරිතාව ගොඩනැගීම කෙරෙහි අවධානය යොමු කරමින් ශ්‍රී ලංකාවේ පුස්තකාල සේවා නවීකරණය කිරීමට කෘත්‍රිම බුද්ධිය භාවිත කිරීමේ හැකියාව මෙම සම්මන්ත්‍රණයේදී ගවේෂණය කර ඇති බව සඳහන්.
දැනුම පරතරය අවම කිරීම සහ රට පුරා නවෝත්පාදනයන් පෝෂණය කිරීම සඳහා උත්ප්‍රේරකයක් ලෙස පුස්තකාලයාධිපතිවරුන්ට සහාය වීමට තම රජය කැපවී සිටින බව පැවසූ අග්‍රාමාත්‍යවරිය ඩිජිටල් පරිවර්තනය සඳහා වන අපේක්ෂාවන් පිළිබඳව ද වැඩිදුරටත් ඉස්මතු කර සිටියා.
