Local

පැරෂුට් අනතුරේ භටයින්ගේ තත්ත්වය බලන්න ජෙනරාල් ශවේන්ද්‍ර යයි

Tuesday, 30 January 2024 - 9:56 pm

නිදහස් සැමරුම් උත්සවයේ පුහුණුවීම් කටයුතු අතරතුර අනතුරට පත්වූ පැරෂුට්කරුවන්ගේ තත්ත්වය සොයා බැලීම සදහා ආරක්ෂක මාණ්ඩලික ප්‍රධානී ජෙනරාල් ශවේන්ද්‍ර සිල්වා මහතා යුද හමුදා රෝහලට පැමිණ සෙබළුන්ගේ සුව දුක් සොයා බැලීය.

අද (30) පෙරවරුවේ නිදහස් දින පෙරහුරුව සඳහා සහභාගී වූ ආරක්ෂක අංශ සාමාජිකයින් සිව්දෙනෙකු පැරෂුට් සංදර්ශනයේ පෙරහුරුව අතරතුරදී බිමට ඇදවැටී රෝහල් ගත කළ අතර ඔවුන්ගේ තත්ත්වය බරපතළ නොවන බව ගුවන් හමුදාව සදහන් කළේය.

අනතුරෙන් යුද හමුදාවේ පැරෂුට්කරුවන් දෙදෙනෙකු සහ ගුවන් හමුදාවේ පැරෂුට්කරුවන් දෙදෙනෙකු තුවාල ලැබීය.

තුවාල ලැබූ පැරෂුට් භටයින් සිව්දෙනා මේ වනවිට කොළඹ ජාතික රෝහලේ සහ යුද හමුදා රෝහලේ ප්‍රතිකාර ලබමින් සිටී.