Local

කෙහෙළියගේ පුත් රමිත්ගේ සුපිරි නිවාස 2ක් පරිහරණය උසාවිය තහනම් කරයි

Friday, 20 September 2024 - 9:39 am

හිටපු සෞඛ්‍ය ඇමැති කෙහෙළිය රඹුක්වැල්ල මහතාගේ පුත් රමිත් රඹුක්වැල්ල මහතාට අයත් සුඛෝපභෝගී නිවාස දෙකක් පරිහරණය කිරීම තහනම් කරමින් කොළඹ මහාධිකරණය ඊයේ (19) නියෝගයක් නිකුත් කළේය. අල්ලස් කොමිසම විසින් කරන ලද ඉල්ලීමක් සලකා බැලූ කොළඹ මහාධිකරණ විනිසුරු මංජුල තිලකරත්න මහතා මෙම නියෝගය නිකුත් කළේය.

අල්ලස් කොමිසම අධිකරණයට දැනුම් දී තිබුණේ රමිත් රඹුක්වැල්ල මහතා විසින් කොල්ලුපිටිය ප්‍රදේශයේ පිහිටි සුඛෝපභෝගී නිවාස සංකීර්ණයක නිවාස දෙකක් රුපියල් මිලියන 80ක් සහ රුපියල් මිලියන 65 බැගින් මිලදී ගෙන තිබෙන බවයි. එම මිලදී ගැනීම් ප්‍රශ්නගත වන බැවින් විමර්ශන කටයුතු සඳහා එම නිවාස දෙක සම්බන්ධයෙන් තහනම් නියෝගයක් නිකුත් කරන ලෙස අල්ලස් හෝ දූෂණ කොමිෂන් සභාව අධිකරණයෙන් ඉල්ලීමක් කළේය.

එම ඉල්ලීම සලකා බැලූ මහාධිකරණ විනිසුරුවරයා ලබන දෙසැම්බර් මස 19 දා දක්වා එම දේපොළ පරිහරණය කිරීම තහනම් කරමින් නියෝගයක් නිකුත් කළේය.