Local

හිටපු අගවිනිසුරු ශිරාණි බණ්ඩාරනායක ඉවත් කිරීමට ගත් තීරණය මම අනුමත කරන්නේ නෑ - නාමල්

Friday, 28 March 2025 - 10:10 pm

හිටපු අගවිනිසුරුවරියක් වන ශිරාණි බණ්ඩාරනායක, අගවිනිසුරු ධුරයෙන් ඉවත් කිරීමට ගත් තීරණය තමා අනුමත නොකරන බව පාර්ලිමේන්තු මන්ත්‍රී නාමල් රාජපක්ෂ පවසනවා.

ඉතිහාසය තුළ යම් නිලධාරීන් සම්බන්ධයෙන් ගත් දේශපාලන තීන්දු වැරදි බවත්, එම වැරදිවල ඵල විපාක අදටත් පක්ෂයක් ලෙස විඳින බවත් මාධ්‍ය වෙත අදහස් දක්වමින් මන්ත්‍රීවරයා සඳහන් කළා.

ආණ්ඩුවට පොලිස්පතිවරයා සම්බන්ධයෙන් ගැටලුවක් ඇත්නම් ව්‍යවස්ථානුකූලව කටයුතු කළ හැකි බවත්, ආණ්ඩුව තුළ මන්ත්‍රී ධුර 159 ක් සිටින නිසා එය කළ හැකි බවයි ඔහු පෙන්වා දෙන්නේ.

එහිදී කථානායකවරයා විසින් කමිටුවක් පත්කර, අදාළ නිලධාරියාටත් කරුණු දැක්වීමට ඉඩ ලබාදී, සාධාරණ වාර්තාවක් මත පාර්ලිමේන්තු විවාදයක් සිදුකර තීන්දුවක් ගත හැකි බවයි නාමල් රාජපක්ෂ මන්ත්‍රීවරයා වැඩිදුරටත් ප්‍රකාශ කර සිටියේ.