Local

වගා නොකළ ඉඩම් කඩිනමින් වගා කිරීමට ගොවිජන සංවර්ධන දෙපාර්තමේන්තුවෙන් විශේෂ වැඩපිළිවෙළක්

Saturday, 22 March 2025 - 2:18 pm

වගා නොකළ ඉඩම් කඩිනමින් වගා කිරීම සඳහා විශේෂ වැඩපිළිවෙළක් ක්‍රියාත්මක කරන බව ගොවිජන සංවර්ධන දෙපාර්තමේන්තුව පවසනවා.

ඒ අනුව, වගා නොකළ කුඹුරු ඉඩම් වගා කිරීම කෙරෙහි විශේෂ අවධානය යොමු කර ඇති බවයි එහි කොමසාරිස් ජෙනරාල් රෝහණ රාජපක්ෂ සඳහන් කළේ.

'එක මිටට ගොවි බිමට' වැඩසටහන යටතේ දිවයින පුරා කළ සමීක්ෂණයේදී වගා නොකළ කුඹුරු ඉඩම් අක්කර 68,000කට අධික ප්‍රමාණයක් හඳුනා ගෙන තිබෙන අතර, එම සමීක්ෂණයේදී හඳුනාගත් වගා නොකළ ගොඩ ඉඩම් ප්‍රමාණය 29000 කට අධික බවයි සඳහන් වෙන්නේ.

ඒ අනුව වසර 40ක් පුරන්ව පවතින කුඹුරු ඉඩම්වල ස්ථිර භෝග වගා කිරීමට සැලසුම් කර ඇති බවද ගොවිජන සංවර්ධන දෙපාර්තමේන්තුවේ කොමසාරිස් ජෙනරාල් රෝහණ රාජපක්ෂ වැඩිදුරටත් සඳහන් කර සිටියා.