ජනාධිපති රනිල් වික්‍රමසිංහ මහතා විසින් ඊයේ පාර්ලිමේන්තුවට ඉදිරිපත් කළ අතර 2024 වර්ෂය සඳහා වන අයවැය දෙවන වර කිවවීමේ පළමු දිනය වන අද විවාදයට එක්වෙමින් රාජ්‍ය අමාත්‍යවරයා මේ බව පැවසීය.

වසර 25ක් පමණ පැරණි සමෘද්ධි සංවර්ධන දෙපාර්තමේන්තුවේ, 24,000ක් පමණ වූ එම නිලධාරින්ට නිසි උසස් වීම් පටිපාටියක් නොතිබූ බවත් එම උසස්වීම් පටිපාටිය සකස් කර දීම සම්බන්ධයෙන් ජනාධිපති රනිල් වික්‍රමසිංහ මහතා ප්‍රමුඛ රජයට ස්තුතිවන්ත වන බව හෙතෙම පැවසීය.

ඉඩම් නොමැති ජනතාවට ඉඩම් අයිතිය ලබා දීම මෙවර අයවැයේ සුවිශේෂී කාරණයක් බව රාජ්‍ය අමාත්‍යවරයා වැඩිදුරටත් පැවසීය. ලක්ෂ 20ක් පමණ වූ ඉඩම් හිමිකමක් නොමැති ජනතාවට එම ගොවි බිම්වලපූර්ණ පුද්ගලික අයිතිය ලබා දීමට මෙවර අයවැයෙන් යෝජනා කිරීම වැදගත් බව හෙතෙම පෙන්වා දුන්නේය. ජනතාවට ස්වාධීනව ඉඩමක අයිතිය ලබා දීම ඔහුගේ ස්වාධීන ඉදිරි ගමනට ඉතා වැදගත් බව රාජ්‍ය අමාත්‍යවරයා සඳහන් කළේය.

මෙවර අයවැයෙන් නොපෙනෙන දැවැන්ත ආර්ථික ශක්තියක් ජනතාවට ලබා දී ඇතැයිද රාජ්‍ය අමාත්‍යවරයා සඳහන් කළේය. ආර්ථික අර්බුදය නිසා අසරණ වූ ජනතාවට සහණ ලබා දීම සඳහා මෙවර අයවැයෙන් මුදල් වෙන් කර තිබේ. අස්වැසුම වැඩසටහන සහ ආබාධිත පුද්ගලයන්, වකුගඩු රෝගීන් සහ වැඩිහිටියන් වෙනුවෙන් වන දීමනා සඳහා මෙවර අයවැයෙන් වෙන්වන මුදල රුපියල් බිලියන 205 දක්වා වැඩි කර තිබේ. මෙම වසරේ ආබාධිත ජනතාව වෙනුවෙන් විශේෂ පනතක් ඉදිරිපත් කිරීමට බලාපොරොත්තු වන බවද කීය.