සංචාරකයන්ගේ පැමිණීම ගැන මාලිමා නායකයා කැනඩාවේදී බොරු කියලා
Tuesday, 02 April 2024 - 7:57 am
මෙරට සංචාරය කරන සුදු ජාතිකයින් ගෙන් 33 % ක් යළි මෙරට සංචාරය සඳහා පැමිණෙද්දී මාලිමාවේ නායකයා එය 3 % ක් ලෙස සඳහන් කරමින් කැනඩාවේ දී සාවද්‍ය ප්‍රකාශයක් කළේ යැයි සංචාරක, ඉඩම් හා ක්‍රීඩා හා යෞවන කටයුතු අමාත්‍ය හරීන් ප්‍රනාන්දු පවසයි.
යමක් පිළිබඳ කරුණු හරිහැටි නොදන්නේ නම් ඒ සම්බන්ධයෙන් සාවද්‍ය මත පළ නොකර අදහස් නොදක්වා සිටීම වැදගත් යැයි ද ඒ මහතා කීය. මහනුවර දී මාධ්‍ය හමුවේ අදහස් දක්වමින් ඇමැතිවරයා මේ බව පැවසුවේය. මෙරට සංචාරය කළ බ්‍රිතාන්‍ය, ජර්මන් හා ප්‍රංශ ජාතිකයින් යළි මෙරට සංචාරය සඳහා කිහිප වතාවක්ම පැමිණෙන බව පර්යේෂණ මඟින් තහවුරුව තිබෙන බවත් ඔවුන් නැවත නැවත ගෙන්වා ගැනීමට නම් අලුත් ගමනාන්ත හඳුන්වා දිය යුතුව තිබෙන බවත් ඇමැතිවරයා ප්‍රකාශ කළේය.
මෙම වසරේ මාර්තු 31 වැනිදා වනවිට සංචාරකයින් 628000ක් මෙරටට පැමිණ තිබෙන බවත් මේ අනුව ඉතිහාසයේ වසරක් තුළ මෙරටට පැමිණි වැඩිම සංචාරකයින්ගේ සංඛ්‍යාව මෙම වසරේ දී වාර්තා වීමට බොහෝ දුරට ඉඩ තිබෙන බවත් හෙතෙම අවධාරණය කළේය.
මේ වනවිට වසරක දී සංචාරකයින් වැඩිම පිරිසක් මෙරටට පැමිණ තිබෙන්නේ 2018 දී බවත් එම සංඛ්‍යාව ලක්ෂ 23ක් බවත් හරීන් ප්‍රනාන්දු පැවසුවේය.
සංචාරක ප්‍රවර්ධන වැඩසටහන් ලෝකය පුරා ක්‍රියාත්මක කිරීමට සැලසුම් කරන බවත් මේ වනවිට එමිරේට්ස් ගුවන් සේවය 06කින් ද කටාර් එයාර් වේස් ගුවන් සේවය 05කින් ද ෆ්ලයි ඩුබායි ගුවන් සේවය 04 කින් ද දෛනික ගුවන් ගමන් වාර වැඩිකර තිබෙන බවත් ඇමැතිවරයා ප්‍රකාශ කළේය. මැතිවරණයක් පැමිණීම අපරාධයක් ද කියා සිතෙන තරමට සංචාරකයින් මෙරටට පැමිණෙමින් තිබෙන බවත් පටු අරමුණු වෙනුවෙන් දේශපාලනඥයින් කඩාකප්පල් කිරීම් නොකළහොත් රටට සුවිශාල ජයග්‍රහණ රැසක් අත්පත් කර ගැනීමට අවස්ථාව මේ ඔස්සේ සැලසෙනු ඇති බවත් කීවේය.
මෙම මස 26 හා 27 දෙදිනේ දී සමුද්‍ර කේන්ද්‍රීය සංචාරක ප්‍රවර්ධන වැඩසටහනක් ක්‍රියාත්මක කරන බවත් දෙවන ලෝක යුද සමයේ දී ශ්‍රී ලංකා මුහුද ආශ්‍රිතව මුහුදුබත් වූ නැව් 143ක් නැරඹීම සඳහා ඒ යටතේ විදේශිකයින්ට පහසුකම් සලසන බවත් කී තල්මසුන් සමඟ පිහිනා අත්දැකීම් ලබා ගැනීමේ වැඩසටහනක් ද ක්‍රියාත්මක කරන්නේ යැයි පැවසුවේය. ගුවනින් ගොස් මෙරට සුන්දරත්වය දැක ගැනීම සඳහා යෝධ බැලුන් 08ක් ආනයනය කිරීමට පියවර ගෙන ඇතැයි ද ඇමැතිවරයා ප්‍රකාශ කළේය.
.webp)
