මදුරුවන් බෝ වන තැන් ගැන 0117 966 366 අංකයට කියන්න
Monday, 08 January 2024 - 9:47 am
මදුරුවන් බෝවන ස්ථාන ඇත්නම් ඒ බව 0117966366 දුරකතනයට දැනුම් දිය හැකි බව සෞඛ්‍ය ඇමැති වෛද්‍ය රමේෂ් පතිරණ මහතා පැවැසීය. ඉකුත් දිනයේ මෙම දුරකතන අංකයට ඇමැතුම් 37ක් ලැබී ඇතැයි ද ඇමැතිවරයා පැවසුවේය. ඩෙංගු මදුරු මර්දන සහ පාලන කටයුතු වඩාත් ශක්තිමත් කිරීමට ජනාධිපතිවරයාගේ මඟ පෙන්වීම හා සෞඛ්‍ය ඇමැතිවරයාගේ උපදෙස් පරිදි ක්‍රියාත්මක විශේෂ වැඩසටහන් මාලාවට එක්වෙමින් ඇමැතිවරයා මේ බව ඊයේ (07) ප්‍රකාශ කළේය. මෙම විශේෂ වැඩසටහන ඊයේ (07) සිට 13 වැනිදා දක්වා ක්‍රියාත්මක වේ. “ඔබේ පරිශ්‍රය මදුරුවන් බෝවීමට නොහැකි ලෙස තබාගන්න” යන්න තේමා කර ගනිමින් මේ වැඩසටහන ක්‍රියාත්මක වේ. මෙම වැඩසටහනේ බස්නාහිර කොළඹ දිස්ත්‍රික්කයේ සමාරම්ක වැඩසටහනක් සෞඛ්‍ය ලේකම් විශේෂඥ වෛද්‍ය පාලිත මහීපාල මහතාගේ ප්‍රධානත්වයෙන් සහ පොලිස්පති දේශබන්දු තෙන්නකෝන් මහතාගේ සහභාගීත්වයෙන් කොම්පඤ්ඤවීදිය වැල්ලවත්ත සහ විජේරාම ප්‍රදේශවලින් ඊයේ (07) ආරම්භ කෙරිණි.
සන්ධ්‍යා කරුණාරත්න, මැද කොළඹ සමූහ – අරියරත්න ගනේගොඩ
