අනුරපුර සිරගේ රැඳවූවකුට කිඹුල් ප්‍රහ‍ාරයක්
Wednesday, 24 January 2024 - 8:46 pm
මල්වතු ඔයට යාබදව වගා කටයුතුවල නිරතව ඉඳලා
අනුරාධපුර බන්ධනාගාරයේ රැඳවූවකු පෙරේදා (22) රාත්‍රියේ කිඹුල් ප්‍රහාරයකට ලක් වී ඇත. කිඹුලා විසින් ඇදගෙන යන අවස්ථාවේ ඔහු දැඩි පරිශ්‍රමයක් යොදා කිඹුලාගෙන් බේරී තිබේ. සිද්ධියෙන් දැඩි ලෙස තුවාල ලැබූ ඒ රැඳවූවා අනුරාධපුර ශික්ෂණ රෝහලට ඇතුළත් කිරීමෙන් අනතුරුව ශල්‍ය කර්මයකට භාජනය කර ඇති බවද වාර්තා වේ.
මෙලෙස කිඹුල් ප්‍රහාරයට ලක් වී ඇත්තේ අනුරාධපුර බන්ධනාගාරයේ එළිමහන් සිර කඳවුරේ රඳවා සිටි 34 හැවිරිදි දමිළ ජාතික සිරකරුවෙකි. මොහු ඇතුළු පිරිසක් බන්ධනාගාර භූමියේ මල්වතු ඔයට යාබදව වගා කටයුතුවල නිරත වෙමින් සිටියදී උණ පඳුරක් ආසන්නයේ සැඟව සිටි කිඹුලකු මේ රැඳවූවාගේ කකුලෙන් අල්ලා මල්වතු ඔයට ඇදගෙන ගොස් ඇති බව බන්ධනාගාර නිලධාරියෙක් පැවසීය.
කිඹුල් ප්‍රහායෙන් මේ රැඳවූවාගේ එක් අතකට, කකුලකට සහ ගෙල ප්‍රදේශයට තුවාල සිදු වී ඇති අතර, තුවාලකරු අනුරාධපුර ශික්ෂණ රෝහලේ 11 වාට්ටුවට ඇතුළත් කිරීමෙන් අනතුරුව ඊයේ (23) උදෑසන ශල්‍ය කර්මයකට භාජනය කෙරිණි.
කිඹුල් ප්‍රහාරය එල්ල වූ ස්ථානයට මාධ්‍යවේදීන් පිරිසක් ඊයේ (23) උදෑසන යන විටත් විශාල ප්‍රමාණයේ කිඹුලකු මල්වතු ඔයේ ඒ මේ අත සැරි සරන අයුරු දැකගැනීමට හැකි විය. මල්වතු ඔයේ සිටින කිඹුලන් නිසා එම ඔය දෙපස වෙසෙන තම ජීවිතද මහත් අනතුරක ඇති බව ජනතාව පවසති. සංචාරක කර්මාන්තය දියුණු කිරීමේ අරමුණින් මේ වන විට මල්වතු ඔයෙහි බෝට්ටු සේවාවක්ද ආරම්භ කර ඇති අතර, ඒ සඳහා පැමිණෙන දෙස් විදෙස් සංචාරකයන්ගේද ජීවිතය අනතුරේ ඇති බව ඔවුහු පෙන්වා දුන්හ. ප්‍රදේශවාසීහු වගකිව යුතු බලධාරීන්ගේ ඉල්ලා සිටින්නේ මල්වතු ඔයේ සිටින කිඹුලන් අල්ලා වෙනත් ස්ථානයකට රැගෙන ගොස් දමන ලෙසයි.
