මිලියන 321ක බෙහෙත් ෆේල්
Sunday, 20 October 2024 - 10:19 pm
රාජ්‍ය ඖෂධ නීතිගත සංස්ථාව විසින් වෛද්‍ය සැපයුම් අංශය වෙනුවෙන් ඉකුත් වර්ෂයේ දී (2023) මිල දී ගනු ලැබූ ඖෂධ තොග අතුරින් රුපියල් මිලියන 321.24ක වටිනාකමින් යුතු ඖෂධ වර්ග 26ක් තත්ත්වයෙන් අසමත් වී තිබූ බව ජාතික විගණන කාර්යාලය මගින් නිකුත්කොට ඇති නවතම විගණන වාර්තාවක සඳහන් වේ.
එසේ තත්ත්වයෙන් අසමත් ව තිබූ ඖෂධ වර්ග 19ක් සඳහා අදාළ සැපයුම්කරුවන්ගෙන් රුපියල් මිලියන 288.71ක මුදලක් අය කර ගෙන නොතිබූ බව ද විගණනය මගින් අනාවරණය කර ඇත. 2022 හා 2023 යන වර්ෂවල දී ඖෂධ කල් ඉකුත්වීම සහ හානිවීම නිසා සංස්ථාවට දැරීමට සිදු වූ මුළු අලාභය රුපියල් මිලියන 86.37කි.
අයකර නොගත් මුදල් සැපයුම්කරුවන්ගෙන් කඩිනමින් අයකර ගැනීමට කටයුතු කළයුතු බවට විගණනය මගින් නිර්දේශ කර ඇත.
රාජ්‍ය ඖෂධ නීතිගත සංස්ථාව සම්බන්ධයෙන් 2023 වර්ෂයට අදාළව මෙකී විගණන වාර්තාව නිකුත් කර තිබුණි.
