මාතලේ රක්ෂිතවලට කුණු දැමීම පුරුද්දට ගිහින් ජලපෝෂක ප්‍රදේශ හා රක්ෂිත අනතුරේ
Friday, 26 January 2024 - 8:10 am
රාජ්‍ය හා රාජ්‍ය නොවන සංවිධාන දිගින් දිගටම ප්‍රජාව දැනුම්වත් කළද පොදු හා සොභා රක්ෂිත ප්‍රදේශවලට කැළි කසළ බැහැර කිරිම් නැවතී නැතැයි පරිසර ලෝලීහු කියා සිටිති.
අධි සංවේදී පරිසර පද්ධතියක් වන නකල්ස් සොභා රක්ෂිත ප්‍රදේශය, මොරගහකන්ද ජල පෝෂක කලාපය, නාලන්ද ජලාශ රක්ෂිතය, බෝවතැන්න ජලාශ රක්ෂිතය මෙන්ම ඒ නවය මාර්ගය දෙපස හා නාඋල ප්‍රදේශයේ පාරිසරික වශයෙන් සුන්දර ස්ථාන මෙන්ම මොරගහකන්ද ජලාශ පිවිසුමට සමීප වන මාර්ගය දෙපස ආදී සුවිශේෂි ස්ථාන රැසකට අරක්කු බෝතල්, සායනික අපද්‍රව්‍ය, සනිපාරක්ෂ තුවා, බීර ටින් වර්ග, පොලිතීන් විශේෂ මෙන්ම නරක් වු කෑම වර්ග ද කිසිදු වග විභාගයකින් තොරව භාහිර පරිසරයට මුදා හැරිම් වැඩි වී ඇතැයි ඔවුහු පෙන්වා දෙති.
මේ අතර රාජ්‍ය නොවන සංවිධානයක් වන ‘දුම්බර මිතුරෝ’ පරිසර සංවිධානය කියා සිටියේ සොභා රක්ෂිතවලට කැළිකසළ හා නොදිරන අපද්‍රව්‍ය බැහැර කිරීම් හේතුවෙන් වඳවීයෑමේ තර්ජනයන්ට ලක්ව ඇති ශාක හා සත්ත්ව විශේෂ රැසක් විනාශ වීමේ අවදානමකට ලක්ව ඇති බවයි. කෙසේ වෙතත් පසුගිය සමය තුළ පොලිසි, රාජ්‍ය ආයතන මෙන්ම ස්වෙච්ඡා සංවිධාන විසින් කැළි කසළ ඉවත් කිරිමේ කටයුද අඛණ්ඩව සිදු කරමින් සිටිය ද ඊට සාපේක්ෂව කැළි කසළ බැහැර කිරීම් ද සමානුපාතිකව සිදුවන බව එම පරිසර සංවිධානය අවධාරණ කරයි.
.webp)
