දිලිදු පවුල් වලට අවම රුපියල් දස දහසක මාසික දීමනාවක් දෙනවා..
Tuesday, 20 August 2024 - 9:19 pm
ශක්තිමත් තීන්දු තීරණ ගැනීම සඳහා ශක්තිමත් ජනවරමකට සියලු ජනතාවගේ සහය මාලිමාවට දෙන ලෙස ජාතික ජන බලවේගයේ නායක ජනාධිපති අපේක්ෂක පාර්ලිමේන්තු මන්ත්‍රී අනුර කුමාර දිසානායක මහතා පැවසීය.
රටේ ආර්ථිකය කඩා වැටීමෙන් පහළ ග්‍රාමීය ජනතාවට ජීවත් විය නොහැකි තත්වයක් උදා වී ඇති බව කී දිසානායක මහතා ඒ අනුව එම පවුල් වලට අවමය රුපියල් දස දහසක් වන සහනාධාර දීමනාවක් මාසිකව ලබා දීමට පියවර ගන්නා බවද පැවසීය.
ඔහු මෙසේ පැවසුවේ ජාතික ජන බලවේගය විසින් සංවිධානය කරන ලද ජනාධිපතිවරණ ජන හමුවක් අමතමිනි.
‘මිනිස්සුන්ට කන්න නැතුව රට හදල වැඩක් නැහැ. රට හදන වැඩේ. ක්‍රමානුකූලව කළ යුතුයි. එහි ආරම්භයේදී අප ජනතාව ගැන බලා ගන්නවා. ලයිට් බිල අඩු කරනවා. කැළණිතිස්ස, කෙරවළපිටිය විදුලි බලාගාර හදල තියෙන්නේ ස්වාභාවික ගැස් වලට හරවන්න පුළුවන් විදිහට. ඒවා ඩීසල් වලින් දුවන්න තීරණය කළේ තාවකාලිකවයි. නමුත් දැන් අවුරුදු පහළොවක් වෙනව තවමත් ගැස් වලට පරිවර්තන වුණේ නැහැ. එහෙම වුණොත් විදුලි බිල අඩු කරන්න පුළුවන් ජාතික ජන බලවේගයේ ආණ්ඩුව පළමු ප්‍රමුඛතම ව්‍යාපෘතිය මේ පද්ධතිය ස්වාභාවික ගැස් වලට පරිවර්තනය කිරීමයි’
