මහ බැංකු කාර්ය මණ්ඩලයේ පමණක් වැටුප් වැඩි කිරීම අනුමත කළ නොහැකි ක්‍රියාවක්
Saturday, 09 March 2024 - 8:37 am
රාජ්‍ය අංශයේ වියදම් අවම කර ගැනීමට ප්‍රතිපත්තිමය තීන්දුවක් ගෙන ඇති පසුබිමක මහ බැංකුවේ කාර්ය මණ්ඩලය පමණක් 70%කින් වැටුප් වැඩි කර ගැනීම අනුමත කළ නොහැකි ක්‍රියාවක් බව හිටපු මුදල් ඇමැති රවී කරුණානායක පැවසීය.
මහ බැංකුව ස්වාධීන ආයතනයක් කිරීම පදනම් කර ගනිමින් මෙරට ජාතික ප්‍රතිපත්තියට පටහැනිව තවත් රටක් මෙන් කරන අත්තනෝමතික හැසිරීමක නිරතවීමට ඉඩ නොදිය යුතු බවත් මීට පෙර රට බංකොලොත් බව මහ බැංකුව විසින් නිල වශයෙන් ප්‍රකාශ කරනු ලැබුවේ ද පාර්ලිමේන්තුවේ කිසිම අනුදැනුමක් නොමැතිව බවත් ඒ මහතා සිහිපත් කළේය.
හිටපු මුදල් ඇමැති රවී කරුණානායක මේ බව සඳහන් කළේ කොළඹදී (06) පැවති මාධ්‍ය හමුවකදී අදහස් දක්වමිනි.
එහිදී වැඩිදුරටත් හිටපු මුදල් ඇමැති රවී කරුණානායක මෙසේද පැවසීය.
අපට මතකයි පසුගිය සමයේ රට බංකොලොත් බව මහ බැංකුව ප්‍රකාශ කළ අවස්ථාවේ ඒ ගැන ප්‍රසිද්ධ කිරීමට පෙර පාර්ලිමේන්තුවේ අදහස් විමසීමක් නොකළ බව. පාර්ලිමේන්තුවේ අනුදැනුමක් නැතුව තමයි එදා ඒ තීන්දුව ගත්තේ. එදා ඩොලරය රුපියල් 380- 385ක් වැනි අගයක තිබුණේ. නමුත් ජනාධිපති රනිල් වික්‍රමසිංහගේ ප්‍රතිපත්තිය හමුවේ රටේ මූල්‍ය විනයක් ඇතිකරගෙන ගිය වැඩපිළිවෙළ නිසා අද වන විට එය රුපියල් 307ක් පමණ අගයකට පත්ව තිබෙනවා.
මෙහිදී ප්‍රධාන කරුණු දෙකක් ගැන අවධානය යොමු කළ යුතුයි. පළමු වැන්න තමයි මේ ආකාරයට ඩොලරය හමුවේ රුපියල ශක්තිමත් බව පෙනුනත් අපි තවමත් විදෙස් ණය නොගෙවන බව. දෙවැන්න තමයි රජයේ වියදම් කිසියම් පාලනයකට නතු කර තිබෙන බව. ඒ නිසා ඉතා ප්‍රවේශමෙන් අප කටයුතු කළ යුතුයි. තවමත් අර්බුදය අවසන් නෑ. මෙහිදී ආදායම් වැඩි කිරීමක් ගැන දිගින් දිගටම අදහස් දක්වනවා. නමුත් රාජ්‍ය වියදම් අඩු කිරීම, අනවශ්‍ය වියදම් අඩු කිරීම ගැනත් අවධානය යොමුකළ යුතුයි.
මේ රටේ බදු ආදායමින් රුපියල් බිලියන 1700ක් පමණ වැය කරන්නේ ලක්ෂ 16ක් පමණ වන රාජ්‍ය සේවකයන් ප්‍රමාණයක් නඩත්තු කිරීමටයි. රාජ්‍ය බදු ආදායමින් 75%-80% ක් පමණ ඊට වැය කෙරෙනවා. මේ තත්ත්වය වෙනස් කළ යුතුයි. අපට පුළුවන් නම් මේ ප්‍රමාණය රුපියල් බිලියන 900කට වගේ අඩුකර ගන්න, ඒ ඉතුරු මුදලින් සෞඛ්‍ය අංශයේ අඩුපාඩු , පාසල් පද්ධතිය සංවර්ධනය කිරීම, සුළු හා මධ්‍ය පරිමාණ ව්‍යවසායකයන් නැංවීම වැනි කටයුතු සඳහා යොදවන්න පුළුවන්.එහිදී මේ යොදවන මුදල් පෙරලා ආයෝජන බවට පත්වෙනවා.
අද සංචාරක කර්මාන්තයෙන් ඩොලර් බිලියන 5ක් වගේඋපයනවා. විදෙස්ගත ශ්‍රමිකයන් මඟින් ඩොලර් බිලියන 7ක් වගේ ඉපයීමක් වෙනවා. මේ ගණන ප්‍රමාණවත් නෑ. රජයේ නිලධාරීන් මේ ගැන දැනුවත්. ඒ වගේම මේ සම්බන්ධව ක්‍රියාමාර්ග ගැනීම ඔවුන්ගේත් රාජකාරිය. ඔවුන් දේශපාලනඥයන් දැනුවත් කළ යුතුයි. උපාය මාර්ග යෝජනා කළ යුතුයි. ඒ හැර නිදාගෙන ඉඳලා දැන් බංකොලොත් කියලා කියන්න වෘත්තිකයන් මොකටද ?
මහ බැංකුව ස්වාධීන වූ පදනමින් ඒක මේ රටේ තියෙන වෙන රටක් වගේ හැසිරෙන්න නරකයි. නමුත් ඔය අවදානම එන්න පුළුවන් බව කාලයකට පෙර මමත් පෙන්වා දුන්නා. නමුත් එදා පාර්ලිමේන්තුව නියෝජනය කරන පිරිස ඒ ගැන අවධානය යොමු කළේ නෑ. දැන් කරන්න තියෙන්නේ කවුරුත් පොදු ප්‍රතිපත්තිය ඇතුළේ සිට වැඩ කරමු කියන යෝජනාව කරන්නයි. අවශ්‍ය ප්‍රතිලාභ අනිත් සැමටම වගේම මේ අර්බුද සමය අවසන් කර ගත්තාට පසුව ලබාගමු කියන එකඟතාවට පැමිණීමයි.
රාජ්‍ය අංශයේ, මහ බැංකුවේ දක්ෂ කාර්යක්ෂම නිලධාරීන් සිටිනවා. පිරිසක් තමයි මේ අත්තනෝමතික ආකාරයට හැසිරෙන්නේ. ආර්ථිකය කියන විෂයේ වෘත්තීයභාවය ඔවුන්ට තියෙනවා කියන පදනමින් ප්‍රතිපත්තිමය තීරණ වෙනස් කරන්න ඉඩදෙන්න නරකයි. මොකද රාජ්‍ය අංශයේ තවත් ඉංජිනේරුවන් ඉන්නවා, ගණකාධිකාරීවරුන්, නීතිඥයන්, මහාචාර්යවරුන්, පර්යේෂකයන් ඉන්නවා. ඒ අයත් ඔවුන්ගේ විෂයට අදාළ වෘත්තිකයන්. තීන්දු තීරණ ගන්නකොට වගකීමෙන් කටයුතු කරන්න ඕනෑ කියන්නේ ඒ නිසයි.
