Local

රුක්මන් සේනානායකගේ අවසන් කටයුතු අද

Monday, 26 August 2024 - 8:17 am

මෙරට ප්‍රථම අග්‍රාමාත්‍යවරයා වූ මහාමාන්‍ය ඩී.එස්. සේනානායක මහතාගේ මුනුපුරෙකු වූ එක්සත් ජාතික පක්ෂයේ ජ්‍යෙෂ්ඨ සාමාජිකයකුද වන හිටපු ඇමැති රුක්මන් සේනානායක මහතා පෙරේදා (24) පෙරවරුවේ අභාවප්‍රාප්ත විය. 1948 ජුනි 21 වැනි දින උපත ලැබූ රුක්මන් සේනානායක මහතා ගල්කිස්ස ශාන්ත තෝමස් විද්‍යාලයේ කීර්තිමත් ආදි ශිෂ්‍යයෙකි.

1973 වර්ෂයේ දී එක්සත් ජාතික පක්ෂය නියෝජනය කරමින් පළමුවරට පාර්ලිමේන්තුවට තේරී පත් විය. ඉන් අනතුරුව 2004 වසර දක්වා කාලය තුළ අවස්ථා කීපයකදීම ඔහු එක්සත් ජාතික පක්ෂය නියෝජනය කරමින් පාර්ලිමේන්තු මන්ත්‍රීවරයකු ලෙස කටයුතු කරන ලදි.

සේනානායක මහතා 2001 වසරේ දී එක්සත් ජාතික පෙරමුණු රජයේ පරිසර ඇමැතිවරයා ලෙසද කටයුතු කළ අතර 2007 වසරේ දී එක්සත් ජාතික පක්ෂයේ සභාපතිධුරයටද පත්විය.

රුක්මන් සේනානායක මහතා මිය යන විට 76 හැවිරිදි වියේ පසු වූ අතර ඒ මහතාගේ දේහය පිළිබඳ අවසන් කටයුතු අද (26) පස්වරු 4.00ට බොරැල්ල පොදු සුසාන භූමියේ දී සිදු කිරීමට නියමිතය.