ඔස්කාර් සහ එමී සම්මාන ලාභී සුප්‍රසිද්ධ සිනමා තරුවක් ලංකාවට
Wednesday, 18 June 2025 - 5:39 pm
ඔස්කාර් සහ එමී සම්මාන ලාභී සුප්‍රසිද්ධ බ්‍රිතාන්‍ය නළු ජෙරමි අයිරොන්ස් (Jeremy irons) ඊයේ (17) ශ්‍රී ලංකාවට පැමිණ ඇත.
ඒ ජාත්‍යන්තර ප්‍රදර්ශනය අරමුණු කොට ගෙන මෙරටදී නිෂ්පාදනය කෙරෙන දැවැන්ත චිත්‍රපටයක් වන ‘The Caged Bird‘ සිනමා නිර්මාණයේ රංගනයකටය.
මෙම චිත්රපටය අධ්‍යක්ෂණය කරන්නේ ප්‍රවීණ ශ්‍රී ලාංකික සිනමා අධ්‍යක්ෂකවරයෙකු හා නිෂ්පාදකවරයෙකු වන වන චන්ද්‍රන් රත්නම් විසිනි.
ජෙරමි අයිරොන්ස් ඉන්දියාවේ මුම්බායි සිට ශ්‍රී ලංකන් ගුවන් සේවයේ UL-144 ගුවන් යානයෙන් ශ්‍රී ලංකාවට පැමිණි අතර, එම යානය කටුනායක බණ්ඩාරනායක ජාත්‍යන්තර ගුවන්තොටුපළට පැමිණ තිබුණේ ඊයේ (17) රාත්‍රියේය.
මෙහිදී ශ්‍රී ලංකා සංචාරක ප්‍රවර්ධන කාර්යාංශයේ නියෝජ්‍ය අධ්‍යක්ෂ හරේන්ද්‍ර විජේවර්ධන සහ ජාත්‍යන්තර චිත්‍රපට නිර්මාණ සහ ප්‍රවර්ධන අංශයේ සහකාර අධ්‍යක්ෂ චමින්ද මුණසිංහ ඇතුළු පිරිස ඔහුව උණුසුම් අයුරින් ශ්‍රී ලංකාවට පිළිගෙන ඇත.
ඒ අනුව ඔහු ඉදිරියේදී ‘The Caged Bird‘ චිත්‍රපටයේ රූගත කිරීම්වලට සම්බන්ධ වීමට නියමිතය.
මෙම චිත්‍රපටයේ රූගත කිරීම් සඳහා, සුප්‍රකට දකුණු ඉන්දීය සිනමා නිළි වරලක්ෂ්මි සරත්කුමාර් ද ඊයේ (17) මෙරටට පැමිණියාය.
‘The Caged Bird‘ චිත්රපටය නිෂ්පාදනයේ අරමුණ වන්නේ ශ්‍රී ලංකාව චිත්‍රපට හා සංචාරක ව්‍යාපාරය සඳහා ප්‍රමුඛ ගමනාන්තයක් ලෙස ස්ථානගත කිරීම සහ ජාත්‍යන්තර නළු නිළියන්ගේ සහ සිනමා ලෝලීන්ගේ ගෝලීය අවධානය මෙරටට ආකර්ෂණය කර ගැනීමයි.
.webp)
.webp)
.webp)