මාර්තු 15 වනදා විනාඩි 05 ක් වැයකර සත්ත්ව සංගණනයට සහාය වන්න - කෘෂිකර්ම අමාත්‍යාංශය
Monday, 03 March 2025 - 6:45 pm
මාර්තු 15 වනදා සත්ත්ව සංගණනයක් සිදු කිරීමට රජය තීරණය කර ඇති බව කෘෂිකර්ම අමාත්‍යංශය පවසනවා.
ඒ අනුව මාර්තු 15 වනදා උදෑසන 8.00 සිට 8.05 දක්වා විනාඩි 05 ක කාලයක් තුළ මෙම විද්‍යාත්මක සත්ත්ව සංගණනය සිදුකරන බවයි එම අමාත්‍යංශය සඳහන් කළේ.
සත්ව කාණ්ඩ 4 ක් පිළිබඳව මෙහිදී අවධානය යොමු කරන බවත්, ඒ අනුව රිළවා, වඳුරා, මොණරා සහ දඬුලේනා යන සත්ත්වයන් මෙහිදී සංගණනයට ලක් කරන බවයි කෘෂිකර්ම අමාත්‍යංශයේ අතිරේක ලේකම් දිස්නා රත්නසිංහ සඳහන් කළේ.
මේ අනුව ප්‍රදේශයේ ග්‍රාම නිලධාරීවරයා විසින් සියළුම නිවාස හිමියන් වෙත පත්‍රිකාවක් ලබාදෙනු ඇති බවත්, අදාළ විනාඩි 05ක කාලය තුළ තමන්ගේ ගෙවත්තේ අදාළ සත්ත්ව වර්ග 4 කොපමණ ප්‍රමාණයක් සිටිනවාද යන්න එහි සටහන් කළ යුතු බවයි කෘෂිකර්ම අමාත්‍යංශයේ අධ්‍යක්ෂ (කෘෂි තාක්ෂණ) තනුජ හේමන්ත අමරසිංහ සඳහන් කළේ.
මෙහිදී පොදු ස්ථානවල සිටින සතුන් සංගණනය සඳහා ග්‍රාම නිලධාරීවරයා විසින් අදාල පුද්ගලයෙක් පත්කළ යුතු බවත්, තේ වතු ආදිය සඳහා මුළු බිම් ප්‍රමාණය කොටස් ලෙසට බෙදා අදාල වතු අධිකාරී විසින් එක් එක් කොටසකට අදාළ අයෙක් පත්කළ යුතු බවයි වැඩිදුරටත් සඳහන් වන්නේ.
විනාඩි 05 ක කාලයක් සළකා ඇත්තේ ද්විත්ව සංගණනය වැලැක්වීමට බවත්, මෙම ක්‍රියාවලිය විද්‍යාත්මකව පිළිගත් ක්‍රමවේදයක් අනුව සිදුකරන බවත් අදාල නිලධාරීන් වැඩිදුරටත් සඳහන් කළා.
මෙම ක්‍රියාවලිය සාර්ථක කර ගැනීමට සහාය වන ලෙසයි ඔවුන් මහජනතාවගෙන් වැඩිදුරටත් ඉල්ලා සිටියේ.
.webp)
