මියගිය සැරයන් අනුරාධගේ බිරියටත් දරුවාටත් සාධාරණය ඉටු කරනවා -මන්ත්‍රී මහින්දානන්ද අලුත්ගමගේ
Monday, 29 January 2024 - 10:17 am
මියගිය සැරයන් අනුරාධ ජයකොඩි මහතාගේ බිරියට සහ දරුවාට රජය මැදිහත්ව යම්කිසි සාධාරණයක් ඉටු කිරීමට කටයුතු කරන බව මහනුවර දිස්ත්‍රික් පාර්ලිමේන්තු මන්ත්‍රී මහින්දානන්ද අලුත්ගමගේ මහතා පැවැසීය.
මන්ත්‍රීවරයා මෙසේ කියා සිටියේ පසුගිය 25 වැනිදා කටුනායක අධිවේගී මාර්ගයේදී ජලසම්පාදන රාජ්‍ය ඇමැති සනත් නිශාන්ත මහතා ගමන් ගත් මෝටර් රථය අනතුරකට ලක්වීමෙන් මියගිය රාජ්‍ය ඇමැතිවරයාගේ ආරක්ෂක නිලධාරියා ලෙස කටයුතු කළ පොලිස් සැරයන් අනුරාධ ජයකොඩි මහතාගේ අවමඟුල් උත්සවයට සහභාගි වෙමිනි.
පෙරේදා (27) පස්වරුවේ හෑදෙණිය, මරවනාගොඩ පිහිටි අනුරාධ ජයකොඩි මහතාගේ නිවෙසට පැමිණි මහින්දානන්ද අලුත්ගමගේ මන්ත්‍රීවරයා ජයකොඩි මහතාගේ දේහයට අවසන් ගෞරව දැක්වීමෙන් අනතුරුව ඔහුගේ ඥාතීන් සමඟ කතාබහක නිරතවෙමින් වැඩිදුරටත් මෙලෙස කියා සිටියේය.
“යම්කිසි අයෙක් රාජ්‍ය නිලධාරියකු ලෙස සේවයට බැඳුණාම ඒ තිබෙන ප්‍රශ්න ටික විසඳාගන්න තිබෙන අමාරුකම මම හොඳාකාරවම දන්නවා. ජනාධිපතිවරයා සනත් නිශාන්ත රාජ්‍ය ඇමැතිවරයාගේ අවමඟුල් උත්සවයට පැමිණි අවස්ථාවේ සැරයන් අනුරාධ ජයකොඩිගේ පවුල පිළිබඳ කතා කළා. මේ සම්බන්ධව ඇමැති ටිරාන් අලස් මහතා සමඟ ද දුරකතනයෙන් කතා කළා. අනිවාර්යයෙන්ම ජයකොඩි මහතාගේ බිරිය සහ දරුවාට සාධාරණයක් ඉටු කරනවා.”
පොලිස් සැරයන් අනුරාධ ජයකොඩි මහතාගේ අවසන් කටයුතු පෙරේදා (27) පස්වරුවේ හෑදෙණිය, වැරුල්ලගම, මරවනාගොඩ පොදු සුසාන භූමියේදී පූර්ණ පොලිස් ගෞරව සහිතව සිදු කළ අතර, එම අවස්ථාවට අනුරාධ ජයරත්න, ඩී. වී. චානක, මහින්දානන්ද අලුත්ගමගේ, නාමල් රාජපක්ෂ, සංජීව එදිරිමාන්න, රංජිත් බංඩාර, ගුණතිලක රාජපක්ෂ යන මැති ඇමැතිවරුන් ඇතුළු විශාල පිරිසක් එක්ව සිටියහ.
