කොච්චර ඉහළ මිලකට වී මිල දී ගත්තත්, සහල් මිල වැඩි කරන්නේ නෑ - ලාල්කාන්ත
Saturday, 15 February 2025 - 9:30 pm
ගොවියාගේ පැත්තෙන් බලන විට වී මිල සම්බන්ධයෙන් හෝ වී විකුණා ගැනීමට න‍ොහැකිවීමේ හෝ ප්‍රශ්නයක් නොමැති බව කෘෂිකර්ම අමාත්‍ය කේ.ඩී. ලාල්කාන්ත පවසනවා.
මෙතෙක් කලක් පැවති ගැටළුව වූයේ නිෂ්පාදන මිලටත් වඩා අඩුවෙන් වී විකිණීමට සිදුවීම බවත්, මෙවර එම ගැටළුව සම්පූර්ණයෙන්ම විසඳී ඇති බවත්, පෞද්ගලික අංශයෙන් වී මිලදී ගැනීම සිදු කරන නිසා ගොවීන් හට වී විකුණා ගැනීම ගැන ප්‍රශ්ණයක් නැති බවයි මාධ්‍ය හමුවකට එක්වෙමින් අමාත්‍යවරයා පෙන්වා දුන්නේ.
රජයේ අවම වී මිල රුපියල් 120/- ලෙස ප්‍රකාශ කිරීමෙන් ඊට වැඩි මිලකට වී මිලදී ගැනීම සිදුවන නිසා ගොවියාට කිසිදු ගැටළුවක් ඇති වී නොමැති බවද, ඉදිරියේදී ගැටළුවක් මතුවනු ඇත්තේ පාරිභෝගිකයාගේ පැත්තෙන් බවද ඔහු සඳහන් කරනවා.
ඉහළ මිලකට වී මිලදී ගැනීමේදී වී මෝල් හිමියන්ගේ පාර්ශ්වයෙන් සහල් මිල වැඩි කිරීමේ නැඹුරුතාවයක් ඇති බවත්, නමුත් ඔවුන් කුමන මිලකට වී මිලදී ගත්තත් සහල් මිල ප්‍රකාශ කර අවසන් බවත්, පාරි‍භෝගික අධිකාරිය ශක්තිමත් කර සහල් මිල සම්බන්ධ තීරණය ක්‍රියාත්මක කරන බවයි අමාත්‍යවරයා පවසා සිටියේ.
කිසිසේත්ම සහල් මිල ඉහළ නොදමන බවත්, පාලන මිලට වඩා සහල් විකුණන අය සම්බන්ධයෙන් අනිවාර්යයෙන්ම නීතිය ක්‍රියාත්මක කිරීමට පියවර ගන්නා බවයි අමාත්‍ය කේ.ඩී. ලාල්කාන්ත වැඩිදුරටත් සඳහන් කරන්නේ.
.webp)
