අපේ ප්‍රතිපත්ති ප්‍රකාශනය වැඩියෙන්ම බලන්නෙ සජබ කට්ටිය
Friday, 30 August 2024 - 7:05 pm
තමන්ගේ ප්‍රතිපත්ති හැදීම පැත්තකට දාලා අද සමහරු අපේ ප්‍රතිපත්ති ප්‍රකාශනය අල්ලගෙන කියවනවා. සමහරු ෆොටෝකොපි කරගෙන කියවනවා. මේ දවස්වල අපේ ප්‍රතිපත්ති ප්‍රකාශනය වැඩියෙන්ම ඩවුන්ලෝඩ් කරන්නේ සජබයේ කට්ටිය යැයි ජාතික ජන බලවේගයේ ජාතික විධායක සභික සුනිල් හඳුන්නෙත්ති මහතා පැවසුවේය.
ඒ මහතා මේ බව කියා සිටියේ කන්තලේදී පෙරේදා (28) පැවැති රැලියකට එක් වෙමිනි.
ජාතික ජන බලවේගයට වැඩපිළිවෙළක් නැහැ. ඒගොල්ලෝ බලයට ආවොත් රට කරන්නේ කෙහොමද කියලා අසමින් සිටි අයගේ දැන් දෙකොණ පූට්ටු වෙලා. කටඋත්තර නැති වෙලා.
සජබයේ අය අගෝස්තු 22 වැනිදා ප්‍රතිපත්ති දාන්න බලාගෙන හිටියේ. ඒත් දැම්මෙ නැහැ. මේ දවස්වල අපේ එක බලාගෙන පිටපත් කිරීම කරනවා. ඒගොල්ලන්ට වැඩපිළිවෙළක් නැහැ. මේ කාටවත් එහෙම එකක් නැහැ. මේ රට ගොඩනඟන “පොහොසත් රටක් – ලස්සන ජීවිතයක්” ජනතාවට උරුම කර දිය හැකි විද්‍යාත්මක හා දියුණුව ප්‍රතිපත්ති ප්‍රකාශනය ඉදිරිපත් කර තිබෙන්නේ ජාතික ජන බලවේගය පමණයි.
අපේ ජාතික නිෂ්පාදන සැලැස්මේ බලශක්ති ක්ෂේත්‍රය ශක්තිමත් කිරීමේදී අපේ ත්‍රිකුණාමලේ තෙල් ටැංකි ටික ඉතා වැදගත්. එය යළි ප්‍රතිසංස්කරණය කර, ඔබට ප්‍රතිලාභ ලබාදීමට අපේ පාලනයක් තුළ අප ඉක්මනින්ම පියවර ගන්නවා. අනෙක් අතට ත්‍රිකුණාමල වරාය අපේ රටට විශාල සම්පතක්. ඒකෙ පිහිටීම අතින් ලෝකයේම අති විශේෂ වරායක්. ඒකෙන් අපේ ආර්ථිකය ගොඩනැඟීම සඳහා දායක කරගත හැකි අවස්ථාව අපට නැති කළේ කවුද? ඒ වගේම ඉල්මනයිට් නිධිය මඟින් එකතු කළ අගය මත නව නිෂ්පාදන ක්‍රමවේදයකට සකස් කරලා එම ඛනිජ සම්පතින් විදේශ විනිමය උපයා ගන්න තිබුණු අවස්ථාව අපේ රටට ලබා දෙන්න බැරි කළේ හිටපු පාලකයන් තමයි. අනුර සහෝදරයා ජනාධිපති වූ පසු ජනතාවගේ සහභාගිත්වයත් සමඟ නවීන තාක්ෂණය යොදා එම සම්පත වැඩිදියුණු කර, රටට විදේශ විනිමය උපයා ගන්න අප සැලසුම් කර තිබෙනවා. කන්තලේ ගොවි ජනපද ව්‍යාපාරය වැනි මහ ගොවි ජනපද ව්‍යාපාර වැඩි දියුණු කරලා, අස්වද්දලා මේ ප්‍රදේශයේ ජනතාවට වගේම රටේ ජනතාවටත් ප්‍රතිලාභ අත්පත් කරලා දෙන්න ජාතික ජන බලවේගයේ ආණ්ඩුවක් යටතේ අප සැලසුම් කර තිබෙනවා යැයිද කීවේය.
.webp)
.webp)