පන්නිල ආනන්ද නාහිමිගේ ජන්ම දිනයට පින්කම් මාලාවක්
Monday, 29 January 2024 - 10:30 am
අත්තනගල්ල අරහත්ත රාජමහා විහාරාධිපති, ආචාර්ය පන්නිල ශ්‍රී ආනන්ද නාහිමිපාණන් වහන්සේගේ 77 වැනි ජන්ම දිනය නිමිත්තෙන් පසුගියදා (26) පින්කම් මාලාවක් පැවැත්විණි.
ශ්‍රී ලංකා රාමඤ්ඤ මහා නිකායේ මහානායක අග්ගමහා පණ්ඩිත මකුලෑවේ ශ්‍රී විමල මහනාහිමියන් විසින් ආචාර්ය පන්නිල ශ්‍රී ආනන්ද නාහිමිපාණන් වහන්සේගේ ජන්ම දිනය වෙනුවෙන් විශේෂ තිළිණයක් ද ලබා දෙන ලදි.
මෙම පින්කම් මාලාවට සමගාමීව අත්තනගල්ල අරහත්ත රාජමහා විහාරයේ බෝධි ප්‍රාකාරය ඉදිරිපිට අභිනවයෙන් ඉදිකළ කිරිගරුඬ බුදුපිළිම නිරාවරණය කිරීම, අවට විහාරස්ථානවල වැඩවාසය කරන භික්ෂුන් වහන්සේලා වෙනුවෙන් වෛද්‍ය සායනයක් පැවැත්වීම, වතුපිටිවල රෝහලේ අලුතින් ඉදිකළ බුදු මැදුර හා වැසිකිළි පද්ධතිය විවෘත කිරීම, 3000කට අධික ප්‍රදේශවාසීන්ට ඇස් කණ්ණාඩි පරිත්‍යාග කිරීම මෙන්ම අක්ෂි කාච පරිත්‍යාග කිරීමක් ද සිදු කෙරිණි. තවද මෙහිදී අඩු ආදායම්ලාභීන් 300කට පමණ වියළි ආහාර බෙදා දුන් අතර ආචාර්ය පන්නිල ශ්‍රී ආනන්ද නාහිමියන්ට නිදුක් නිරෝගී චිරජීවනය පතා අටවිසි සම්බුද්ධ පූජාවක් ද දායක දායිකාවන්ගේ සහභාගිත්වයෙන් පවත්වන ලදි. ඉන් අනතුරුව පන්නිල ශ්‍රී ආනන්ද නාහිමියන් විසින් කතරගම කිරි වෙහෙර බෝසමිඳුන් උදෙසා ගිලන්පස පූජාවක් ද පවත්වා පින්කම් මාලාව අවසන් කෙරිණි.
