තරගය මැද සිදුවූ දේට චන්දිමාල් සමාව ඉල්ලයි
Friday, 27 September 2024 - 9:06 am
සංචාරක නවසීලන්ත කණ්ඩායම සහ ශ්‍රී ලංකාව අතර ඊයේ (26) ආරම්භ වූ දෙවන ටෙස්ට් ක්‍රිකට් තරගයේදී දිමුත් කරුණාරත්න දුවද්දි දැවියාම සම්බන්ධයෙන් දිනේෂ් චන්දිමාල් අදහස් පළ කළේය.
තරගයේ පළමු දිනයේ නිමාවෙන් පසු පැවති ප්‍රවෘත්ති සාකච්ඡාවට එක්වෙමින් ඔහු පැවසුවේ ඒ සම්බන්ධයෙන් තමන් දිමුත් කරුණාරත්නගෙන් සමාව අයැද සිටි බවය.
'මම ආපු ගමන් එයාට (දිමුත්ට) සොරි කිව්වා. එයාට කකුලේ ආබාධයක් ආවා අවාසනාවන්ත විදිහට. ඒ වෙලාවේ ඔහු මට කිව්වා චන්දි පුළුවන් ලකුණ විතරක් ගමු, හදිසි ලකුණුවලට යන්න ඕන නැහැ කියලා. ඒ ලකුණ මං හිතන්නේ හදිසි ලකුණක්. මම මානසිකව ලෑස්තිවෙලා හිටියේ නැහැ ඒ ලකුණ ගන්න. මොකද දිමුත් කිව්වා ඒ වෙලාවේ එයාට කකුලේ ආබාධයක්, මට වෙලාව දෙන්න ඒක හදාගන්න කියලා. ඒක තමයි එතන සිදුවුණේ. නමුත් මගේ වැරැද්ද. මං ඒ වරද පිළිගන්නවා '.
පළමු දිනයට තරගය නතරකරන විට සිය පළමු ඉනිම සඳහා පන්දුවට පහර දෙමින් සිටි ශ්‍රී ලංකා කණ්ඩායම කඩුලු 03ක් දැවී ලබාසිටි ලකුණු සංඛ්‍යාව 306කි.
ඇන්ජලෝ මැතිව්ස් නොදැවී ලකුණු 78ක් ලබා සිටි අතර කමිඳු මෙන්ඩිස් නොදැවී ලබා සිටි ලකුණු සංඛ්‍යාව 51කි.
ශ්‍රී ලංකා ඉනිම වෙනුවෙන් විශිෂ්ට පිති හරඹයක නිරත වු දිනේෂ් චන්දිමාල් සිය 16 වන ටෙස්ට් ශතකය වාර්තා කරමින් ලකුණු 116ක් ලබාගැනීමට සමත්වුණි.
තරගය පැවැත්වෙන්නේ ගාල්ල ජාත්‍යන්තර ක්‍රිකට් ක්‍රීඩාංගණයේ දී ය.
