මේ ක්‍රමය වෙනස් කරන්නට නම් හදවතින් නොව මොළයෙන් ඡන්දය දෙන්න - ජනක රත්නායක
Tuesday, 17 September 2024 - 10:32 am
ජනපති අපේක්ෂක ජනක රත්නායක
හදවතින් නොව මොළයෙන් ඡන්දය පාවිච්චි කිරීම කරන ලෙස තමා ඉල්ලා සිටින බව එක්සත් ලංකා පොදුජන පක්ෂයෙන් ජනපතිවරණයට තරග කරන ජනක රත්නායක මහතා අනුරාධපුරයේදී පැවැසීය.
1948 සිට මේ දක්වා මේ රටේ පවුල් කිහිපයක් අතර දේශපාලන නායකත්වය රැඳී තිබෙනවා. මේ රටේ දේශපාලනය කරපු අය පොහොසත් වී මහජනතාව දුප්පත් වුණා. මැතිවරණ සමයේ නායකයන් දෙන විවිධ පොරොන්දුවලට ඔවුන් රැවටුණා.
මේ ක්‍රමය වෙනස් කරන්න අලුත් කෙනකුට රාජ්‍ය පරිපාලනය ගැන දන්න, මහජනතාවගේ පැත්තෙන් හිතන, ව්‍යාපාරිකයකු මෙන්ම හිටපු රාජ්‍ය නිලධාරියකු වූ මට ‘කෝප්පය’ ට ඡන්දය දී අවස්ථාව දෙන ලෙස ඉල්ලනවා. අලුත් රටක් හැදිය හැක්කේ එවිටය. එදා මහජනතාවගේ පැත්තෙන් හිතා බිය නැතිව තීන්දු තීරණ ගත්ත නිසා මට ගෙදර යන්න සිද්ධ වුණා. මම ගත්ත නිවැරදි තීරණ නිසා අදටත් ජනතාවට යම් යහපතක් වී තිබෙනවා. “මට එදා දැරූ ධුරයේ කටයුතු කරන්න ඉඩ දුන්නා නම් මීට වඩා සහනයනක් විදුලි බිලට ලබා ගන්න තිබුණා” යැයි ඔහු කීය.
රත්නායක මහතා අනුරාධපුර පුදබිමට පැමිණ වැඳ පුදා ගනිමින් මහා සංඝරත්නයේ ආශිර්වාදය ලබා ගත් අවස්ථාවේ මාධ්‍ය හමුවේ මේ බව කීය.
