International

බංග්ලාදේශ හිටපු අගමැතිනි හසීනාට මාස 06ක සිර දඬුවමක්

Thursday, 03 July 2025 - 12:06 pm

අධිකරණයට අපහාස කිරීමේ නඩුවකට අදාළව බංග්ලාදේශයේ හිටපු අගමැතිනි ෂෙයික් හසීනාට එරට අධිකරණයක් විසින් මාස හයක සිර දඬුවමක් නියම කර තිබේ.

ත්‍රිපුද්ගල විනිසුරු මඬුල්ලක් විසින් මෙම නියෝගය ලබා දී ඇතැයි විදෙස් මාධ්‍ය වාර්තා කරයි.

බංගලාදේශයේ ඇති වූ දැඩි විරෝධතා හමුවේ 2024 අගෝස්තු 5 වැනිදා ඇය සිය ධුරයෙන් ඉල්ලා අස් වී ඩකාහි ඇති ඇගේ නිවස ද අතහැර ඉන්දියාවේ හෙළි නොකළ ස්ථානයකට රට හැර පලා ගියාය.

ඉන් පසුව ඇයට එරෙහිව නඩුවකට දඬුවම් නියම වූ පළමු අවස්ථාව මෙය වේ.

හසීනාට එරෙහිව නඩු 155 ක් ගොනුකර ඇති අතර එයින් මිනීමැරුම් නඩු 136 ක්, මිනීමැරීමට තැත් කිරීමේ නඩු 8 ක්, පැහැරගැනීමේ නඩු 3 ක් සහ මනුෂ්‍යත්වයට එරෙහි අපරාධ සහ ජන සංහාර නඩු 7 ක් ඇයට එරෙහිව ගොනු කර ඇති බව වාර්තා වේ.